Bugun Toshkentda o'ziga xos arxitekturasiga ega, “vertikal mahalla” tipida qurilgan va an'anaviy o'zbek uy-joy qurilishi elementlarini o'zida jamlagan “Jemchug” (Marvarid) turar-joy binosi ushbu loyihaning muvaffaqiyatli mevasi hisoblanadi.

U 1980 yillarda arxitektor Ofeliya Aydinova tomonidan loyihalashtirilib, 11 yil davomida qurib bitkazilgan. Aslida, bino eski shaharda qurilishi mo'ljallangan bo'lgan. Biroq keyinchalik Kosmonavtlar bog'i yaqinidagi “Buyuk Turon” ko'chasida qurilishiga kelishilgan.
 

“Jemchug”ning o'ziga xosligi shundaki, unda har uch qavat bir umumiy maydon bilan birlashgan va bu joy aholiga dam olish uchun xizmat qiladi. U yerda bolalar sport bilan shug'ullanishi, xonadonlarda yashovchilar ziyofat qilishi yoki suhbatlashib o'tirishi mumkin. Shuningdek, tomda umumiy suzish havzasi, yer ostida esa kir yuvish xonalari, 6 metrlik yerto'la va uchta chiqish yo'li: asosiy, orqa va zaxira yo'llari mavjud.
 

“Marvarid” O'zbekistondagi yagona turdagi 16 qavatli keramsit-betonli monolit uyi hisoblanadi.  U 2 va 3 xonalardan iborat 120 xonadonni o'z ichiga olgan. Bino hozirda davlat muhofazasida.
 

“Dom”ning umumiy ayvonidan shahar ponaramasini yuqoridan turib tomosha qilish imkoni mavjud. Bugun “Jemchug”da alohida gidlik xizmatlari ham tashkil qilingan bo'lib, binoga kirish va tomosha qilish talaba uchun 30, qolganlarga esa 50 ming so'mni tashkil etadi.

Mo''jazligi bilan ajralib turadigan poytaxt marvaridi inson hayoti davomida hech yo'q bir bor ko'rish uchun arziydi.

E'zoza Umur.
Muallif olgan fotolar.