Ulkan tog'lar orasidan “Sangardak” uchun ochilgan yo'l, binoning mahobatliligi, zamonaviy uskununalar har bir mehmonni hayratlantirmay, zavqlantirmay qo'ymaydi.
Ishonch.uz jamoasi ham jarayonda ishtirok etib ushbu kunni tarixga muhrladi.

Poezd tonggi soat 8:00 da Toshkent shahridan Denov tumaniga kelib to'xtadi. Qudratilla Rafiqov barcha mehmonlar, jumladan, sanatoriyga kelgan mehnat faxriylarining kayfiyatini so'ramoqda.

Sangardak. Yangi dam olish maskanining ochilish marosimi ham yangiliklar bilan boshlandi. Samimiy nutq so'zlari, dam olish uchun kelgan faxriy va sariosiyoliklarning ko'zlaridagi hayrat va quvonch bu binoning avvali uchun eng go'zal ibtido bo'ldi.

Binoning ichki qismi, sharoitlari bilan tanishar ekansiz, davolash uchun eng yangi uskunalardan foydalanilishi, malakali shifokorlar xizmat ko'rsatishi, xonalarning ozodaligidan dilingiz yayraydi va yoshi ulug' yaqinlaringni shu yerga dam olishga olib kelish istagi tug'iladi, beixtiyor.

Xursandchilik kuy-qo'shiqlar, shodlik kulgulari ovozi-yu raqslarga ulanib ketgani bu kunning Surxondaryoliklar uchun naqadar muhimligining nishonasidir.

Tadbir so'ngida Toshkent shahridan tashrif buyurgan marosim ishtirokchilari va yangi davolash maskani dam oluvchilari “Sangardak” sharsharasiga sayohat qilishdi. Tabiatning go'zalligi, tog'larning viqori, suvning zilolligi har qanday kishining dilini yayratadi. Ayniqsa, Surxon mevalari o'zining sarxilligi bilan ajralib turadi.
 

Zero, shoir Mahmud Toir aytganiday, “Tog'larga chiqqanlar tog' bo'lib qaytar”!

E'zoza UMURZOQOVA
ishonch.uz