Съезд ишида жами 5 та аъзо ташкилотдан 40 нафар делегат иштирок этмоқда. Шунингдек, йиғилишга «TÜRK-IŞ» касаба уюшмалари конфедерацияси ҳамда Туркия жамоатчилиги вакилларидан бир қатор меҳмонлар ҳам таклиф этилган.

Меҳмонлар орасида Туркий давлатлар Оқсоқоллар кенгаши раиси Биналли Йилдиримбей ҳам бор. Кун тартибидан бир қатор масалалар, хусусан, Ташкилотнинг уставини тасдиқлаш, Ташкилотнинг раҳбар органларини сайлаш каби масалалар ўрин олган.

"Биз бугун Туркий давлатлар вакиллари биргамиз. Бизни жуда катта тарих, бебаҳо умумий мерос бирлаштириб туради. Томирларимиз бир улуғ дарё – Турк дунёси ўзанларидан сув ичади. Қалбларимиз мудом ғурурга тўладики, дунёда давлат ва империялар қуришда, илм ва тафаккур оламида Туркийлар – аждодларимизнинг олдига туша оладиган на бир халқ, на бир миллат бор! Албатта, бу бизнинг кучимиз, ақлу заковатимизни белгилайдиган тарихий фактдир.

Бугун Туркий давлатлар ташкилотининг жадаллик билан ривожланиши халқларимиз ва давлатларимизнинг яқин ҳамкорлиги менга барчамизнинг буюк аждодимиз – қадимий турк давлати асосчиларидан бири Билга Хоқоннинг "Эй туркий элим, ўзлигингга қайт, ўзингни англа – янада юксалгайсан!" деган улуғ даъватини яна бир бор эслатмоқда", -деди Қудратилла Рафиқов Туркий давлатлар касаба уюшмалари Ташкилотининг биринчи съездида.