Ўзбекистон ва Эрон давлатлари раҳбарлари ўртасида телефон орқали мулоқот бўлиб ўтди
Президент Шавкат Мирзиёев ва Эрон Ислом Республикаси президенти Масъуд Пезешкиён ўртасида бўлиб ўтган телефон орқали мулоқотда икки давлат раҳбари бир-бирларини Наврўз ва муборак Рамазон ҳайити – Ийд ал-Фитр билан самимий табриклади.
Қабул қилинган “йўл харитаси” асосида кўп қиррали Ўзбекистон-Эрон муносабатларини янада ривожлантиришнинг долзарб масалалари атрофлича кўриб чиқилди.
Турли даражаларда фаол мулоқотлар ва ташрифлар давом этаётгани мамнуният билан қайд этилди.
Ўзаро савдо ва юк ташиш кўрсаткичлари, қўшма корхоналар сони ошмоқда, пойтахтлар ўртасида мунтазам тўғридан-тўғри авиақатновлар амалга оширилмоқда, ишбилармонлик ва маданий-гуманитар алмашинув кенгаймоқда.
Кимё ва нефть-кимё тармоқлари, тўқимачилик ва озиқ-овқат саноати, қишлоқ хўжалиги, қурилиш материаллари тармоғи ва бошқа йўналишлардаги кооперация лойиҳаларини қўллаб-қувватлаш ва жадал амалга оширишга алоҳида эътибор қаратилди.
Теҳрон шаҳрида ўтказилиши режалаштирилган Ҳукуматлараро комиссия йиғилиши, бизнес форуми ва саноат кўргазмасини самарали ташкил этиш муҳимлиги таъкидланди.
Ўзбекистон ва Эрон етакчилари халқаро ва минтақавий аҳамиятга молик масалалар юзасидан ҳам фикр алмашдилар.
Долзарб мавзулар
Mақолага баҳо беринг
0/50
0
0
0
0