Ҳукуматнинг уй-жой сотиб олиш учун маданият ва санъат ходимларига субсидия тўлаш тартиби тўғрисидаги низомни тасдиқлашга доир қарори лойиҳаси эълон қилинди.

Унга кўра, , маҳаллий бюджетларнинг қўшимча манбалари ҳисобидан ушбу ҳудудда узоқ йиллар самарали фаолият олиб борган маданият ва санъат соҳаси вакилларига ҳамда истеъдодли ёш ижодкорларга ипотека кредити асосида сотиб олинаётган уй-жой қийматининг 50 фоизи миқдорида, бироқ Қорақалпоғистон Республикаси ва вилоятлар учун 192,5 млн сўмдан ҳамда Тошкент шаҳри учун 245 млн сўмдан юқори бўлмаган миқдорда бир марталик субсидия берилади.
Cубсидия тақдим этиш тўғрисидаги тавсиянома олган шахслар ипотека кредити бўйича бошланғич бадалнинг уй-жой қийматининг камида 5 фоизига тенг бўлган қисмини ўз маблағлари ҳисобидан шакллантиради.

Субсидия олиш учун мурожаат қилган ариза берувчининг даромадларига у билан бирга яшамаётган яқин қариндошларининг даромадлари ҳам инобатга олинади.

Якка тартибдаги уй-жойни қуриш (реконструкция қилиш) учун эса ипотека кредитлари Тошкент шаҳридан ташқари барча ҳудудлар учун ажратилади.

Сотиб олинадиган квартиранинг нархи хабарномада кўрсатилган уй-жойнинг юқори қийматидан ошиб кетган тақдирда, қолган қисми қарз олувчи томонидан шакллантириладиган бошланғич бадал суммасини ошириш орқали қопланади.
Шунингдек, ҳар йили маҳаллий бюджетдан шаҳар ва қишлоқ жойларида қурилган кўп қаватли уйлардан бирламчи ва иккиламчи бозорда квартиралар сотиб олишда ипотека кредитлари бўйича бошланғич бадалнинг бир қисмини қоплаш мақсадида ажратиладиган субсидиялар тегишли молия йили учун тасдиқланган параметрлар доирасида амалга оширилади.

Эслатиб ўтамиз, мазкур ҳужжат лойиҳаси жамоатчилик муҳокамаси учун эълон қилинган бўлиб, қабул қилганидан ва расмий эълон қилинганидан сўнг расман кучга киради.