АҚШда туғилган 8 нафар эгизак ҳозир 15 ёшда

Аслида тарихда бундай ҳолатлар кўп бўлган. Аммо уларнинг ҳаммасини ҳам сақлаб қолишнинг имкони бўлмаган. Қуйида саккиз нафар эгизакнинг ҳаёт йўлига назар ташлаймиз.

2009 йил 26 январда Қўшма Штатларда 34 ёшли Надя Сулаймон исмли аёл жарроҳлик йўли билан олти ўғил ва икки қизни дунёга келтирди. У ўша пайтда янги туғилган саккиз чақалоқдан ташқари тўрт ўғил ва икки қизни тарбиялаётган эди. Эгизаклар билан қўшганда Надянинг фарзандлари сони 14 нафарга етди. Бахтга қарши ўша вақтда у ишсиз, бу ҳам етмагандек, эри билан ажрашган эди.

Қайд этиш жоиз, аёлнинг тўнғич ўғлидан бошқа ҳамма боласи ЭКУ уруғлантириш натижасида дунёга келган.

Табиий савол туғилади. Нима учун олти нафар фарзанднинг онаси – Мисс Сулеймонни яна бола кўришга нима ундади?

Ўзининг айтишича, шифокор унга бир вақтнинг ўзида адашиб 12 та эмбрион кўчириб ўтқазган. Шифокор аёлнинг илтимосига биноан ҳаракат қилганини исботлашга уринган. Аммо у тиббий этикани бузгани учун умрбодга лицензиясидан маҳрум қилинган. Келгусида бу каби ҳолатларни олдини олиш учун ЭКУ уруғлантиришни назорат қилиш қонун билан кучайтирилди.

Одамлар аввал аёлга салбий муносабат билдиришган. Ҳатто кўпчилик Надя машҳур бўлиш учун шу ишни қилган деб иддао қилган. Уни оналик ҳуқуқидан маҳрум қилиш керак, деб ҳисоблайдиганлар ҳам топилган.

Надя Сулаймоннинг ўзи эса болаларни пул ва шон-шуҳрат учун дунёга келтирмаганини, уларни жуда севишини таъкидлайди. Лекин у пул топиш мақсадида саккиз нафар чақалоқнинг ҳаёти ҳақида шоу уюштиришга қарор қилади. Ҳар ҳолда Надя ёлғиз ўзи 14 нафар болани боқиши керак эди. Аммо телекомпания ахлоқий сабабларга кўра, у билан ҳамкорлик қилишдан бош тортди.

Шунга қарамай, аёл Америка ток-шоуларининг юлдузига айланди, лекин уларда деярли бепул қатнашарди. Кейин ўзини «банкрот» деб эълон қилди. Фарзандлари учун мурувватли инсонлардан ҳомийлик совғалари келиб турди. Аёл оғир ҳомиладорлик ва туғуруқдан сўнг бир нечта пластик операцияни бошидан ўтказди ва модель бўлиш орзусини рўёбга чиқарди.

Кўп болали она, кейинчалик модель ва инстаблогер сифатида ҳам Интернетда машҳур бўлиб кетди. Инстаграм саҳифасига асосан 8 нафар эгизакнинг фотосуратлари ҳамда видеоларини жойлайди. Чунки бошқа болалари омма учун унчалик қизиқ эмас.

Ҳозир Надя Сулаймон ва фарзандлари ёмон яшамаяпти. Аммо болалар учун етарлича шарт-шароит йўқ. Масалан, ётоқхона етишмайди. Боз устига, улар кичкина ошхонада навбатма-навбат тушлик қилишга мажбур. Шундай бўлса-да, уларнинг уст-боши бутун. Энг муҳими, эгизаклар соғлом, фаол ва умуман, яхши инсон бўлиб, камолга етяпти. Ижтимоий тармоқларда онаси билан соғлом турмуш тарзини тарғиб қилиб келмоқда.

Манзура БАХТИЁР тайёрлади