БМТ резолюцияси: Исроил Фаластин ерларини бўшатиб қўйиши керак
БМТга аъзо давлатлар 18 сентябрь, чоршанба куни Исроилнинг Фаластин ҳудудларини босиб олишга қаратилган ҳарбий ҳаракатларини 12 ой ичида тўхтатиш ва резолюцияга риоя қилмаган тақдирда санкциялар қўллашни талаб қилувчи резолюцияни қабул қилди. Ҳужжатни 124 давлат, жумладан, Ўзбекистон ҳам қўллаб-қувватлади, 14 давлат қарши овоз берди, яна 43 давлат бетараф қолди.
Резолюцияда Исроил қўшинларини Фаластин ҳудудидан олиб чиқиб кетиш, босиб олинган ҳудудларда янги аҳоли пунктлари қурилишини тўхтатиш, босиб олинган ер вамулкларни қайтариш, шунингдек, кўчирилган фаластинликларнинг қайтиши талаб қилинади. Мажбурий бўлмаган ушбу ҳужжат Халқаро суднинг 1967 йилдан бери босқинчилик «ноқонуний» эканлиги ҳақидаги маслаҳат хулосасига асосланади.
Резолюция Фаластин делегацияси томонидан 2024 йилнинг май ойида БМТ органларидаги ҳуқуқлари кенгайтирилганидан кейин биринчи марта киритилган. Фаластин маъмуриятининг БМТдаги доимий кузатувчиси Риёд Мансурнинг айтишича, ҳужжатдан мақсад «Халқаро ҳамжамиятнинг Бош Ассамблеядаги босими ва Халқаро суднинг тарихий қарори босимидан фойдаланиб, Исроилни ўз хатти-ҳаракатларини ўзгартиришга мажбур қилиш».
Исроил томони эса резолюцияни кескин рад этиб, уни «шармандали қарор» деб атади. Улар БМТни терроризмни рағбатлантираётганликда айбламоқда.
Маълумот учун 2023 йил 7 октябрдан буён давом этаётган Яқин Шарқдаги қуролли можаро ортидан Ғазо секторида жами 41 мингдан ортиқ одам ҳалок бўлган, 95 мингдан ортиқ киши жароҳатланган.
Долзарб мавзулар
Mақолага баҳо беринг
0/50
0
0
0
0