Чингиз Айтматов – ўзбекнинг туғишган ёзувчиси
Дунёда ёзувчилар кўп, аммо улар орасида саноқлиларигагина умумбашариятга мерос асарлар қолдириш, инсониятни ёзганлари билан йиғлатиш ва ҳаяжонлантириш насиб этади.
Буюк қирғиз ёзувчиси, улкан истеъдод соҳиби бўлган Чингиз Айтматовга эса ана шундай бахт насиб этган. Кеча, 12 декабрь — Чингиз Айтматов таваллудининг 97 йиллиги муносабати билан пойтахтимизнинг Юнусобод туманидаги Чингиз Айтматов кўчасида жойлашган ёзувчи ёдгорлиги пойига гул қўйиш маросими бўлиб ўтди.
Маросимни Қирғиз Республикасининг Ўзбекистондаги элчиси Дуйшонкул Чотонов ва Ўзбекистон Ёзувчилар уюшмаси раиси Сирожиддин Саййид очиб берди. Сўнгра ёдгорлик пойига гул қўйиш маросими бўлиб ўтди.
Тадбирда “Ўзбекистон–Қирғизистон” дўстлик жамияти вакиллари, Ўзбекистондаги қирғиз миллий-маданий маркази жамоаси
ҳамда Тошкентда истиқомат қилиб келаётган қирғиз миллатига мансуб фуқаролар, адабий жамоатчилик иштирок этди.
– Чингиз оғани биз ўзимизнинг туғишган ёзувчимиздай кўрамиз, чунки қийин замонларда марказдаги минбарларда туриб ўзбек халқининг шаънини ҳимоя қилган биринчи қардошимиз, – дейди тадбирда сўзга чиққан Ёзувчилар уюшмаси раиси Сирожиддин Саййид.
Тадбир давомида кўплаб жамоатчилик фаоллари ҳам ёзувчи ҳақида ўз хотиралари ва асарлари ҳақидаги илиқ фикрларини айтиб, икки халқ ўртасидаги дўстлик абадий бўлишини тилади.
Маълумот ўрнида, буюк қирғиз адиби Чингиз Айтматов ёдгорлиги Ўзбекистон Республикаси Президенти Шавкат Мирзиёев ташаббуси билан 2018 йил 21 ноябрь куни ўрнатилган.
Гулҳайё ПРИМОВА, ЎзЖОКУ талабаси
Долзарб мавзулар
Mақолага баҳо беринг
0/50
0
0
0
0