Шаҳноза Мирзиёева: Жаҳон кубоги Марказий Осиё сув спорти учун янги саҳифа очиши мумкин

Маросимда Миллий паралимпия қўмитаси раисининг биринчи ўринбосари, Ижтимоий ҳимоя миллий агентлиги директорининг биринчи ўринбосари, World Aquatics Ижроия қўмитаси бюроси аъзоси Шаҳноза Мирзиёева иштирокчиларни қутлаб, мусобақанинг Ўзбекистон ва бутун Марказий Осиё учун аҳамиятига тўхталди.

У Тошкент илк бор сузиш бўйича Жаҳон кубогига мезбонлик қилаётганини таъкидлаб, бу мусобақа дунёнинг кучли спортчилари, мураббийлари ва мутахассисларини бир жойга жамлаганини қайд этди.

Шаҳноза Мирзиёеванинг сўзларига кўра, сўнгги йилларда сув спорти турлари Ўзбекистон спорти ривожининг муҳим йўналишларидан бирига айланди. Мамлакатда замонавий спорт иншоотлари барпо этилмоқда, спортчилар ва мураббийлар қўллаб-қувватланмоқда, болалар ва ёшларни сув спортига жалб қилиш учун янги имкониятлар яратилмоқда.

У асосий мақсад ёшларни сув спорти турларига кенг жалб қилиш ва иқтидорли спортчиларнинг юқори халқаро даражага чиқишига кўмаклашиш эканини билдирди.

Шаҳноза Мирзиёева бу жараён фақат Ўзбекистон учун эмас, балки бутун Марказий Осиё учун ҳам муҳимлигини таъкидлади. Миллий федерациялар ўртасидаги ҳамкорликни кучайтириш, спортчилар, мураббийлар ва мутахассислар учун минтақавий имкониятларни кенгайтириш зарурлиги қайд этилди.

У Тошкентдаги босқичдан кейин мусобақанинг Остона шаҳрида давом этишини Марказий Осиёнинг халқаро сув спортидаги ўрни тобора ортиб бораётганининг белгиси сифатида баҳолади.

Шунингдек, Шаҳноза Мирзиёева дунёнинг энг кучли сузувчиларининг Тошкентдаги беллашувлари ёш спортчилар учун катта илҳом манбаи бўлишини айтди.

Якунда у World Aquatics президенти Ҳусайн Ал-Мусаллам ва ташкилот жамоасига Ўзбекистонга билдирилган ишонч ва қўллаб-қувватлов учун миннатдорлик билдирди.

«Ушбу Жаҳон кубоги Ўзбекистон ва бутун Марказий Осиёда сув спорти турлари учун янги саҳифа очишига умид қиламан», – деди Шаҳноза Мирзиёева.