Фуқароларнинг 8 миллион доллар пулларини ўзлаштирган жиноий гуруҳ фош этилди
Давлат хавфсизлик хизмати Сирдарё вилояти бўйича бошқармаси ходимлари вилоят Ички ишлар бошқармаси билан ҳамкорликда ўтказган тезкор-қидирув тадбирлари давомида кибержиноятчилик билан боғлиқ йирик жиноий гуруҳ фаолиятига чек қўйди.
Аниқланишича, Тошкент шаҳри ва Тошкент вилоятида яшовчи, 1989–2005 йиллар оралиғида туғилган беш нафар шахс пойтахтнинг Миробод туманидаги нотурар бинолардан бирини ижарага олиб, сохта колл-марказ ташкил қилган.
Терговга қадар аниқланган маълумотларга кўра, гуруҳ аъзолари орасида нуфузли банклардан бирининг бош офисидаги киберхавфсизлик бўлими ходими ҳам бўлган.
Жиноятчилар турли банклар номидан фуқароларга телефон орқали қўнғироқ қилиб, уларнинг номига фирибгарлар томонидан кредит расмийлаштиришга уриниш бўлаётгани ҳақида хабар беришган.
Шу тариқа одамларда хавотир уйғотиб, ишончларига киришган ва алдаш йўли билан шахсий маълумотларини қўлга киритишган. Кейин эса жабрланувчиларнинг банк карталаридаги пул маблағларини ўзлаштиришган ва уларнинг номига онлайн кредитлар расмийлаштиришган.
Жиноий фаолият натижасида қўлга киритилган жами 8 миллион АҚШ доллари миқдоридаги маблағ сохта масъулияти чекланган жамият орқали криптовалютага айлантирилиб, хорижий давлатга олиб чиқилган ва легаллаштирилган.
Мазкур ҳолат юзасидан жиноят иши қўзғатилган. Дастлабки тергов жараёнида жиноий фаолиятга алоқадор бўлган яна 10 нафар шахс аниқланган.
