Гўшт бўлмаса қозоннинг қопқоғи, беканинг қовоқ — тумшуғи очилмайди. Истеъмолга бўлган талабнинг ошаётгани эса баъзи нопокларга қўл келаяпти.

Ўтган икки кунда пойтахт сари йўл олган 1,5 тоннадан ортиқ истеъмолга яроқсиз гўшт Самарқандда тўхтатиб қолинди. 1 август куни Булунғур туманидаги “Юқори нуқта” ЙПХ масканида “Самарқанд-Тошкент” йўналишида ҳаракатланиб кетаётган ISUZU машинаси тегишли хизмат ходимлари томонидан текширилганида ҳеч қандай ҳужжатсиз 1100 килограмм гўшт олиб кетаётганлиги аниқланган.

Булунғур туман ҳайвонлар касалликлари ташхиси ва озиқ-овқат хавфсизлиги давлат маркази томонидан текширилган гўшт истеъмолга яроқсиз бўлиб чиқди. 3 август куни Ургут туманида жойлашган “Омонқўтон» ЙПХ масканида “Cobаlt” автоулови тўхтатилган. Машинада санитария нормаларига зид равишда (ҳужжатсиз) 500 килограмм гўшт ортиб кетилаётгани аниқланди. Тегишли расмиятчиликдан сўнг истеъмолга яроқсиз маҳсулот йўқ қилинган. Энди бу қўлга тушганлари…

Аввало, хумдек қайнаётган мослаштирилмаган транспортда тез бузилувчи маҳсулотлар сирасига кирувчи гўштни (ниманинг гўшти эканлигини қўя турайлик) олиб юриш мумкинми? Қолаверса, ачиб-бижғиган гўштнинг харидори ким? Кўнгилни шубҳа гумонлар кемиради. Бозорда бир кило гўшт 80 минг сўмдан кам сотилмаётган бир пайтда, бозорларни лиқ тўлдирган (дудланган яна суяксиз) колбасанинг нархи нега 25-50 минг сўм? Баъзи колбаса ишлаб чиқарувчиларнинг бу “фидоий”лигини қандай тушиниш мумкин? Гўшт масаласида саволлар шу қадар кўпайиб кетган-ки, аниқ-лўнда жавоб берадиган масъулнинг ўзи йўқ…