Шу билан бирга, полковник Рамазон Ашрапов ички ишлар органларида 100 мингга яқин шахсий таркиб мавжуд экани, афсуски, айрим ходимлар томонидан содир этилаётган қонунбузилиш ҳолатлари тизимга доғ тушираётганини очиқ тан олди.

— Биз бу ҳолатларни яширмаймиз. 2025 йилда ички ишлар органлари ходимлари томонидан жами 87 та жиноят содир этилган. Ушбу жиноятларнинг 75 фоизи ички назорат ва вазирликнинг ўз ташаббуси билан аниқланган. Қонунбузарликка йўл қўйган ходимлар ички ишлар органлари сафидан бўшатилиб, уларга оид тўпланган ҳужжатлар қонуний чора кўриш учун прокуратура идораларига юборилган.

Айни пайтда:

18 нафар ходимга нисбатан суд томонидан жазо тайинланган;

40 нафарга нисбатан тергов ҳаракатлари олиб борилмоқда;

19 нафар ходимга нисбатан суд жараёнлари давом этмоқда.

Шунингдек, ҳисобот даврида хизмат интизомини қўпол равишда бузган 124 нафар ходим турли сабабларга кўра тизимдан бўшатилган.

— Бу рақамлар билан ўзимизни оқлаб бўлмайди ва бундай ниятимиз ҳам йўқ. Қонун устувор ва жазо муқаррар. Ходимлар томонидан содир этилган қонунбузилиш ҳолатлари ҳақида вазирлигимиз ахборот хизмати орқали расмий каналларда очиқ маълумот бериб боряпмиз. Буни сизлар ҳам ўз вақтида кўриб келяпсиз, — деди ИИВ раҳбарияти вакили.