Савол: Ишга таклиф қилиндим. Сафардалигим боис 3-4 кундан кейин бордим. Бироқ бошқа ходимни ишга олиб қўйишганлигини айтишди. Қонунчилик бўйича бу ўринда ким ҳақли?

Cаволга Тошкент давлат юридик университети катта ўқитувчиси Муҳаммадамин Каримжонов жавоб берди.

Жавоб: –МК 101-моддасига кўра (Таклиф этилган шахсларга ишга жойлаштириш соҳасидаги қўшимча кафолатлар), башарти иш берувчи ишга жойлаштириш тўғрисидаги таклиф билан жисмоний шахсга таклифнома юборган бўлса, иш берувчи таклифноманинг амал қилиш муддати давомида, агар таклифномада муддат шартлашилмаган бўлса, таклифнома юборилган кундан эътиборан 1️ ой ичида ушбу шахсни ишга қабул қилишни рад этишга ҳақли эмас. Таклифнома деганда иш берувчининг ушбу жисмоний шахс билан меҳнат шартномасини тузиш учун тўғридан-тўғри, аниқ ифодаланган розилик билдириши тушунилади. Таклифнома иш берувчининг тегишли ваколатли мансабдор шахси томонидан ёзма ёки электрон шаклда юборилиши мумкин.

Ушбу модда биринчи қисмининг қоидалари ходим қонунчиликда назарда тутилган барча зарур тартиб-таомиллардан ўтган тақдирда чет эл фуқароларига ва фуқаролиги бўлмаган шахсларга нисбатан татбиқ этилади.

❗️ Демак, агар иш берувчи Сизга ёзма ёки электрон шаклда таклифнома юборган бўлса, агар таклифномада масалан, 2 ойлик муддат кўрсатилган бўлса, 2 ой ичида Сизни ишга қабул қилишлари шарт.

❗️Агар муддат кўрсатилмаган бўлса, таклифнома юборилган кундан эътиборан 1️⃣ой ичида ишга қабул қилиши шарт.

Шунингдек, МК 119-моддасига кўра, иш берувчи томонидан ишга таклиф этилган шахсларни ишга қабул қилмаслик ишга қабул қилишни қонунга хилоф равишда рад этиш деб ҳисобланади.

МК 220-моддасига кўра, агар ходим иш берувчининг таклифига кўра ишга қабул қилинган бўлса, ушбу модданинг 1-қисмида назарда тутилган ҳар йилги қўшимча меҳнат таътилини олиш ҳуқуқини берувчи иш стажига бошқа иш берувчидаги иш стажи киритилади.