Президентимиз ўтган йили 17 октябрда касаба уюшмалари фаоллари ва фахрийлари билан учрашувда “Аёллар дафтари” доирасида касаба уюшмалари ва Ўзбекистон Маҳаллалари уюшмаси ҳамкорлигини янада мустаҳкамлаш бўйича қатор вазифаларни белгилаб берганди.

Ўзбекистон Касаба уюшмалари Федерациясида ўтказилган бугунги йиғилишда мана шу масала кун тартибида бўлди.

Таъкидландики, давлатимиз раҳбари тарихий учрашувда хотин-қизларнинг фаол ижтимоий қатлам бўлиб шаклланишида “Касаба уюшмалари – аёллар манфаати йўлида” деган шиор асосида янги тизимни йўлга қўйиш таклифини илгари сурган эди.

Ушбу тизим доирасида Хотин-қизларни ижтимоий-иқтисодий қўллаб-қувватлаш бўйича комиссия ва Федерация меҳнат бозорида хотин-қизлар учун тенг имкониятлар яратиш, уларнинг ҳаётда ўз ўрнини топишига ва ижтимоий фаоллигини оширишга кўмаклашиш бўйича янги ёндашувларни жорий этиш, уй-жой ва яшаш шароитини яхшилашга, тиббий, психологик, ҳуқуқий ёрдамга муҳтож, тазйиқ ва зўравонликка учраган аёлларни ҳам “Аёллар дафтари” орқали қўллаб-қувватлашни йўлга қўйиш масалаларида касаба уюшмалари етакчи кучга айланиши лозимлигини бугун соҳа вакиллари ич-ичдан ҳис қилиб турибди.

Ҳаммамиз маҳаллада истиқомат қиламиз, “Аёллар дафтари” ҳам маҳалла кўмагида шаклланади. Шу боис амалий ишларда маҳаллалар билан ҳамкорликни кучайтириш, уларни маҳалла еттилиги ёрдамида янада самарали ташкил этиш муҳим, албатта.

Шу мақсадда йиғилишда Ўзбекистон Касаба уюшмалари Федерацияси ҳамда Ўзбекистон Маҳаллалари уюшмаси ўртасида меморандум имзоланди.