“O’zbekiston Neft va Gaz ” журнали: Ўзбекистондаги соҳага оид етакчи нашрнинг янги даври
Энергетика бозори кескин ўзгаришлар, яшил трансформация ва рақамли технологиялар даврини бошдан кечирмоқда. Мамлакатимиз ҳам бу жараёндан четда қолмаяпти: ёқилғи-энергетика тармоғи тубдан ўзгартирилиб, соҳага янги технологиялар жорий этилмоқда. Қолавеса, экологик барқарорлик масалалари ҳар қачонгидан долзарб тус олган. Соҳадаги янгиланишлар сабаб илмий-амалий платформаларга ҳам эҳтиёж ортмоқда. Бу жараёнда “O’zbekiston neft va gaz” журнали мутахассислар фикр алмашадиган майдон, замонавий таҳлил ва инновацион қарашлар учун муҳим манбага айланмоқда. Нашр фақат илмий янгиликларни ёритибгина қолмасдан экспертлар минбари сифатида ҳам хизмат қилмоқда.
Бугунча ребрендинг қилинган журналнинг учта сони тақдим этилди. Журнал профессионал ва илмий ҳамжамият учун тан олинган нашр мақомини сақлаб қолган ҳолда, мазмуни, тақдим этилиши ва дизайни жиҳатидан янада замонавий талқинда чоп этила бошлади.
1996-йилдан буён чоп этилаётган мазкур нашр фаолияти давомида тармоқдаги илғор технологиялар, ишлаб чиқариш амалиёти ҳамда илмий-тадқиқотлар асосидаги ечимларни тизимли тарзда ёритиб келмоқда. Олий аттестация комиссияси томонидан тавсия этилган илмий нашр сифатида журнал бугунги кунда 3000 нусхада чоп этилиб, республика ҳамда хорижлик мутахассисларга етказилмоқда.
Нефт-газ секторида кузатилаётган рақамлаштириш, экологик барқарорлик ва энергия самарадорлигига оид глобал муаммолар журнал олдига ҳам янги вазифаларни қўйди. Шу асосда 2024-йилда амалга оширилган ребрендинг жараёни нафақат ташқи дизайн ва форматни, балки журналнинг концептуал йўналишини ҳам янгилади.
Журналдан қуйидаги рукнлар жой олган:
• етакчи мутахассислар ва соҳа раҳбарлари билан интервюлар;
• геология-қидирув, углеводородларни қайта ишлаш, экология, рақамлаштириш ва келажак энергетикаси бўйича экспертлик материаллари;
• ёш олимлар ва муҳандислар учун ўз тадқиқотлари натижаларини нашр этиш имконияти.
– Бугун соҳада илмий мулоқотни кучайтириш ҳар қачонгидан ҳам муҳим. “O’zbekiston neft va gaz” журнали профессионал ҳамжамият учун эътибор марказида бўлиб, билимлар амалий қийматга эга бўладиган, инновациялар эса қўллаб-қувватланадиган ва ривожланишга эришадиган платформага айланмоқда, – дейди таҳрир ҳайъати раиси, техника фанлари доктори Азизбек Назаров.
Журнални варақлар эканмиз, соҳани барқарор ривожлантиришга доир таҳлиллар, конларни ўзлаштиришда қўлланилаётган илғор технологиялар, халқаро энергетика тамойиллари шарҳи ҳамда энергиядан самарали фойдаланиш борасидаги илмий тадқиқотлар чоп этилганини гувоҳи бўлдик.
