Лойиҳа Мэйжи университети ҳузуридаги PorMedTec стартапи томонидан амалга оширилмоқда. Компания ҳозирданоқ генетик модификация қилинган чўчқаларни кўпайтириш ишларини бошлаган.

PorMedTec раҳбариятининг таъкидлашича, мақсад — чўчқа буйрагини инсонга трансплантация қилиш усулини оғир буйрак етишмовчилигига дуч келган беморлар учун инсондан инсонга буйрак кўчириб ўтказиш ва диализ билан бир қаторда асосий даволаш усулларидан бирига айлантириш.

Лойиҳа тегишли идоралар томонидан маъқулланган тақдирда, клиник синовлар Япониянинг бир вақтнинг ўзида икки шифохонасида ўтказилади. Бу мамлакатда ҳайвондан инсонга буйрак трансплантацияси бўйича ўтказиладиган илк клиник синовлар бўлиши кутилмоқда.

Компания 2030 йилда ҳайвонлардан инсонларга орган трансплантацияси бўйича шартли рухсатнома олишни, 2033 йилга келиб эса чўчқа буйрагини инсонга кўчириб ўтказишни стандарт даволаш усулларидан бирига айлантиришни мақсад қилган.

Лойиҳа доирасида Япониянинг PorMedTec стартапи АҚШнинг eGenesis Inc. биотехнологик компанияси билан ҳамкорлик қилмоқда. Ушбу компания генетик жиҳатдан ўзгартирилган чўчқа ҳужайраларини етказиб бермоқда.

Трансплантация қилинган органнинг инсон организми томонидан рад этилиш хавфини камайтириш мақсадида чўчқа геномига 69 та генетик ўзгартириш киритилади. Бу технология келажакда буйрак етишмовчилиги билан яшайдиган миллионлаб беморлар учун донор органлар танқислиги муаммосини ҳал этишга хизмат қилиши мумкин.