Унга кўра, мигрантлар нафақат ўзлари, балки вояга етмаган фарзандларига ҳам ишлаш ҳуқуқини берувчи патент учун тўлов қилишга мажбур бўлиши мумкин. Бу ҳақда Коммерсантъ нашри хабар берди.

Таклиф этилаётган тартибга кўра, патент олган чет эл фуқаролари ўзидан ташқари вояга етмаган оила аъзолари ва қарамоғидагилар учун ҳам алоҳида тўлов амалга оширади. Ҳар бир бундай шахс учун тўлов миқдори патент нархининг 50 фоизига тенг бўлиши режалаштирилган. Патент қиймати ҳудудларга қараб фарқ қилади: базавий ставка 1,2 минг рубл бўлиб, унга дефлятор ҳамда минтақавий коэффициент қўшилади.

Умуман олганда, мамлакат бўйича патент нархи 3,4 мингдан 27,3 минг рублгача етади, Москва шаҳрида эса тахминан 10 минг рубл атрофида.

Шунингдек, бундай мигрантларнинг фарзандлари балоғат ёшига етгач, ўз номига патент расмийлаштириши ёки мамлакатда қолиш учун бошқа қонуний асос бўлмаса, ҳудудни тарк этиши талаб қилинади.

Молия вазирлиги ташаббуси яна бир жиҳатни ҳам қамраб олади: патент учун аванс тўловини амалга ошириши шарт бўлган визасиз давлатлардан келган чет элликлар доирасини кенгайтириш таклиф этилмоқда. Бу талаб жисмоний шахслар қўлида “шахсий, уй-рўзғор ва шунга ўхшаш эҳтиёжлар” учун ишлаётган мигрантларга нисбатан ҳам татбиқ этилиши мумкин.