Бу ҳақдаги Тошкент шаҳри ҳокимининг қарори лойиҳаси эълон қилинди.

Бундан асосий мақсад аҳолининг электрон тўловлардан фойдаланишини рағбатлантириш. Яъни ким хоҳласа, автобус ва метрода олдингидек эски нархда — 1 минг 700 сўмда юраверсин, бунинг учун электрон тўлов қилиши керак. Ким нақд пулда тўлайман деса, унда 1-январдан бошлаб қимматроқ, яъни 3 минг сўм тўлаши мумкин. Танлов аҳолининг ўзида қолади.

Шунингдек, транспорт карталаридан фойдаланилган ҳолда бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тариф режаларининг нархлари ҳам ҳозиргидай қолади, ўзгармайди.

Тошкент шаҳри йўналишларидаги барча автобуслар салонида йўлкира ҳақини нақд пулда олиш амалиётидан воз кечилади ва йўлкира ҳақини фақат электрон тарзда қабул қилиш амалиёти жорий этилади.

Янги йилдан бошлаб автобус ичида ҳайдовчи ёки кондуктор томонидан аҳолидан нақд пул олиш тақиқланади. Автобусда нақд пулда тўлов қилмоқчи бўлган йўловчилар автобус бекатларида ёки бошқа махсус жойларда нақд пул эвазига бир марталик ҚР-кодли билет сотиб олиши мумкин бўлади.

Бундан мақсад — ҳайдовчи ва кондукторлар томонидан пул маблағларининг талон-торож қилинишига чек қўйиш.

Метроларда нақд пул эвазига билет сотиб олишда эскича тартиб сақланиб қолади.