“Siz salomlashing, sizga ham salom berishadi”

Ushbu shior ostida 21 noyabr' sanasida Butunjahon salomlashish kuni o'tkaziladi. 1973 yil bu bayramni amerikalik ikki aka- uka Maykl va Braen Makkomaklar Misr va Isroil o'rtasidagi urush avjiga chiqqanda o'ylab topishgan. Dunyodagi tinchlik uchun tug'ilgan bu harakatga qo'shilishga hech kimni majbur qilishmagan. Shunday bo'lsa-da bu g'oyani 180 ta davlat qo'llab-quvvatlaydi. Butunjahon salomlashish kunini hamon turli kasbdagi va yoshdagi fuqarolar nishonlab kelishadi.

Xalqaro televidenie kuni

Televidenie tarixi deyarli bir asr avvalgi davrga borib taqaladi.
1996 yilda Birlashgan Millatlar Tashkiloti Bosh assambleyasi ilk marotaba Butunjahon televizion forumini tashkil etish haqida qaror qilib, tadbir o'tkaziladigan sanani "Xalqaro televidenie kuni" deb e'lon qilgan. Garchi dunyoning ko'pgina mamlakatlaridagi soha vakillari 21 noyabrni bayram sifatida nishonlasa-da, boshqa barcha ayyomlar kabi ushbu kunda ham javlon urib ishlayveradilar.
Ko'plab manbalarda televizorning vatani deya Toshkent e'tirof etilgan. Elektron televidenie tizimi 1928 yilda toshkentlik ikki kashfiyotchi B.P. Grabovskiy va I.F. Belyanskiy tomonidan yaratilgan. Tajriba sifatida qo'llanilgan ilk televizion uskuna o'sha paytda "telefot” deb nomlangan.

Turinda shokolad festivali

2003 yildan buyon o'tkaziladigan Turin shokolad festivali boshlanish sanasi ham 21 noyabrga belgilangan (2014 yil hisobi bo'yicha). Hozirgi vaqtda Turinni Italiyaning shokolad markazi deb atash mumkin. Bu yerda har yili 85 ming tonna shokolad ishlab chiqariladi. Bu esa dunyoda ishlab chiqarilgan mahsulotning 40 %ini tashkil qiladi. "CioccolaTo” festivali o'n kun davom etadi va shu kunlarda ko'plab tomoshalar, madaniy tadbirlar, o'yinlar va bolalar uchun musobaqalar o'tkaziladi. Lekin voqealar markazida, albatta, shokolad turadi. Shokoladdan xohlagancha tatib ko'rish, ishlab chiqarishni kuzatish, mahalliy shokoladga baho berish mumkin. Ko'rgazma maydonida shokolad fabrikasi ishlab turadi.