O'tgan haftaning oxirida ijtimoiy tarmoqlarda Toshkent shahar Sergeli tumanidagi maktablarning biri hududida ayol jinsiga mansub fuqaroning zo'rlab, so'ng o'ldirib ketilgani haqidagi xabarlar tarqaldi.

Bosh prokuratura matbuot kotibi Hayot Shamsutdinov “ishonch.uz”ga mazkur holatning joriy yil 1 dekabr' kuni Sergeli tumanidagi 47-sonli maktab hududida aniqlanganini tasdiqlab, o'lim sabablari qotillik jinoyatiga aloqador emasligini ma'lum qildi.

Ma'lum qilinishicha, Sirdaryo viloyati Sardoba tumani “Qo'rg'ontepa” mahallasida doimiy ro'yxatda turgan, ishsiz, vaqtinchalik Toshkent shahar hududi ko'chalarida yashab kelgan 1979 yilda tug'ilgan M.M.ning o'limi yuzasidan o'sha kunning o'zida sud-tibbiyot ekspertizasi tayinlangan.

Ekspertizaning dastlabki ma'lumotiga ko'ra, fuqaro M.M.ning o'limi “surunkali yurak ishemik kasalligi, kardioskleroz, o'tkir yurak qon-tomir yetishmovchiligi, alkagoldan o'tkir zaharlanish, bosh yuqori va pastki lab yumshoq to'qimalarini lat yeyishlari, pastki lab ezilib yirtilgan yarasi, yuz, tana, qo'l va oyoq sohalari qontalashmalari va teri shilinmalari, ichki a'zolari to'laqonligi” natijasida vujudga kelgan.

Hozirda mazkur holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.