“Qashqadaryo viloyatidanmiz. Qizim Toshkentdagi Singapur institutini tamomladi. An'anaga muvofiq diplom himoya kuni yonida turishni, yutug'iga sherik bo'lishni xohladik. Singapur institutining majlislar zalida mana salkam uch soatdan oshdi-ki, svet yo'q. Diplom himoya zamonaviy uskunalar orqali amalga oshirilar ekan. Himoyaga shay turgan talabalarning hafsalasi pir bo'ldi. Zalda 500 nafarga yaqin odam to'plangan. Сhiroq o'chishiga biz viloyatda yashab ko'nikib ketgandirmiz, ammo nufuzli oliygohda uch soatdan beri svetning yonmayotgani albatta ajablanarli. Qolaversa, diplom topshirish uchun Singapurdan institut ta'sischilari kelgan. Talabalarning aytishicha, institutda chiroq o'chishi so'nggi paytlarda odatiy holga aylangan. Viloyatdan kelgan aksar ota-onalar tadbir tugashini mo'ljal qilib, poezdga chipta xarid qilgan ekan.

Noiloj tadbirni ko'ra olmay orqaga qaytib ketishdi. Biz haliyam tadbir bo'lishini kutib o'tiribmiz.

Murojaat ishonch.uz saytiga 13 noyabr 11:33 da kelib tushdi. Darhol “Hududiy elektr tarmoqlari” AJ matbuot kotibi Faxriddin Nuraliev bilan bog'landik. Matbuot kotibi qisqa muddat ichida manzil bo'yicha o'rganib, quyidagicha javob berdi:

— Xususiy qurilish kompaniyasi tomonidan yer qazish ishlari davomida “Singapur 1” va “Singapur 2” yer osti kabeliga jiddiy shikast yetkazilgan. Muammoni bartaraf etish uchun Сhilonzor tumani elektr ta'minoti korxonasi tezkor brigadasi tomonidan ta'minot tiklandi. Ayni paytda iste'molchilar qayta tarmoqqa ulangan. Hozirda muammo bartaraf etildi.

Bizga murojaat yo'llagan yurtdoshimiz bilan bog'landik.

— 20 daqiqa oldin svet yonmaganligi uchun barcha ota-onalar, talabalar va ularning do'stlari zaldan chiqarib yuborildi. Tashkilotchilar hozir qo'ng'iroq qilib, orqaga qayting, svet keldi deyishdi. Tadbir boshlanyapdi, ammo ertalabki kayfiyatdan asar ham yo'q. Ko'pchilikning ota-onasi ketib qoldi.

Poytaxtda ham chiroqning tez-tez o'chib turayotgani allaqachon yangilik emas. Ayniqsa, bu holat anomal sovuq yoki issiq kunlarda ko'p kuzatiladi. Bugungi vaziyatdan kelib chiqib qaraydigan bo'lsak, anomal sovuq yoki issiqda emasmiz. Ammo svet o'chishda davom etmoqda...