Учрашув давомида Россия Федерацияси ҳудудида меҳнат фаолиятини амалга ошираётган Ўзбекистон Республикаси фуқароларининг ҳуқуқлари ва қонуний манфаатларини ҳимоя қилишга доир долзарб масалалар атрофлича муҳокама қилинди.

Музокараларда Ўзбекистон томонидан Россия Федерациясининг турли ҳудудларида фаолият юритаётган Ўзбекистон Республикаси бош консуллари иштирок этди. Бу эса жойлардаги амалий тажрибани инобатга олган ҳолда кўтарилган масалаларни аниқ ва чуқур таҳлил қилиш имконини берди.

Россия томонидан эса дипломатик ваколатхонанинг консуллик бўлими раҳбарияти, миграция масалалари учун масъул ходимлар ҳамда ҳуқуқни муҳофаза қилувчи органлар вакиллари қатнашди.

Учрашувда Ўзбекистон томони миграция текширувлари ва рейд тадбирлари ўтказилаётган жараёнларда Ўзбекистон Республикаси фуқароларининг — ҳам қонунга риоя қилаётган, ҳам миграция қонунчилигини бузган шахсларнинг — ҳуқуқлари ва инсон қадр-қимматини камситишнинг ҳар қандай шаклига йўл қўйилмаслиги принципиал аҳамиятга эга эканини алоҳида таъкидлади.

Томонлар миграция жараёнларини тартибга солиш, шунингдек Россия Федерацияси ҳудудида Ўзбекистон Республикаси фуқароларининг қонуний меҳнат фаолияти учун қулай шарт-шароитлар яратишга қаратилган прагматик ва ўзаро ҳурматга асосланган мулоқотни ривожлантиришга интилишини тасдиқлади.