Учрашув Трамп ва Зеленскийнинг матбуот анжумани билан бошланди, унда икки давлат делегациялари аъзолари ҳам иштирок этди. Трампнинг журналистларга айтишича, АҚШ ва Украина фойдали қазилмалар бўйича келишув тузмоқчи, у буни «жуда адолатли битим» деб атаган. «Ва биз ноёб ер металларининг бир қисмини олиш учун қазиш, қазиш, қазиш ва ишлашни бошлаш имкониятини интиқлик билан кутмоқдамиз», — деди АҚШ президенти.

Трампнинг қўшимча қилишича, АҚШ «Россия билан жуда яхши музокаралар олиб борган» ва Россия президенти Владимир Путин билан суҳбатлашган. «Биз ўлимлар тўхташини истаймиз ва астойдил меҳнат қиламиз… Умид қиламанки, мени тинчликпарвар сифатида эслашади… Бу жуда хавфли вазият, у учинчи жаҳон урушига олиб келиши мумкин. Ҳаммаси нотўғри йўналишда кетаётган эди…», — деди Трамп.

Зеленский, ўз навбатида, келишув «Украина учун ҳақиқий хавфсизлик кафолатлари сари биринчи қадам» бўлишига умид билдирди. «Биз Америка қўллаб-қувватлашни тўхтатмаслигига ишонамиз, бу биз учун ҳақиқатан ҳам жуда муҳим… Путинни тўхтатиш учун сизнинг қатъий позициянгизга жуда ишонаман», — деди Украина раҳбари. У Путинни «қотил ва террорчи» деб атади ва «қотил билан бизнинг ҳудудларимизда муроса бўлмаслиги кераклигини» қўшимча қилди.

Трамп бунга кейинроқ «муросасиз битимлар тузиш мумкин эмас», шунинг учун Зеленский «баъзи муросаларга боришига тўғри келади, лекин умид қиламанки, улар баъзилар ўйлаганчалик катта бўлмайди», деб жавоб берди. Журналистлар Трампдан АҚШ Украина учун хавфсизлик кафолатларини таъминлайдими, деб сўраганида, у бу ҳақда гапиришдан бош тортди ва агар томонлар тинчлик битими тузса, уруш тугашини айтди. «Россия [урушга] қайтишни истамайди, ҳеч ким қайтишни истамайди», — деди АҚШ президенти.

Зеленский бунга жавобан «биз ўт очишни тўхтатиш ҳақида гапира олмаймиз», чунки у хавфсизлик кафолатисиз «ишламайди», деб эътироз билдирди. «2014 йилдан бери Путин ўт очишни тўхтатиш шартларини 25 марта бузди… Шунинг учун биз ҳеч қачон ўт очишни тўхтатишнинг ўзинигина қабул қилмаймиз», — деди Украина президенти.

Ishonch.uz