Катя Даниелла Швейцарияда туғилиб, санъатга ошуфта бўлиб улғаяди. Ўзбек рақс сирларига қизиқиши ортидан юртимизга аввалига сайёҳ бўлиб, кейин рақс академиясида ўқишни қатиий ният қилиб келади.

У ўз иқтидори билан Ўзбекистон давлат хореография академиясига ўқишга киради ва уни 1997 йилда тугатади.
“Ўзбекистонни, халқингизни жудаям яхши кўраман.

Меҳмондўст, санъат ихлосмандлари кўп. Ўз юртдошларимга бу юртнинг фазилатлари ҳақида тўлқинланиб гапириб бераман. Битта ўғлим бор. Наврўз байрами арафасида туғилгани учун Хуршид исмини қўйганмиз. Юртингизни нафақат рақсини балки унинг тарихини ҳам яхши кўраман. Раққосалик санъатини ўрганаётган вақтим Шарқшунослик институтига бориб, ўзбек халқи тарихини ўрганганман” – дейди суҳбатдошим Катя Даниелла.

Катя Даниелла айни пайтда профессионал раққоса сифатида Ўрта Осиё миллий рақсларининг тадқиқотчиси ва шу билан бирга туризм йўналишида таржимон сифатида фаолият юритади. У таниқли ўзбек раққос ва раққосалари Қодир Мўминов, Роза Каримова, Вилоят Оқилова, Сора Тўраева, Ровия Отажонова, Шоира Қурбонова, Насиба Мадраҳимова, Қундуз Миркаримова ва бошқалардан ўзбек рақс санъатининг нозик жиҳатларини ўрганган.

Мухбир: Феруза Раҳимова
Оператор: Диёрбек Ғаниев