Ishonch.uz muxbiri batafsil izoh olish maqsadida ushbu muassasada bo'ldi.

Ma'lum bo'lishicha, xolat joriy yilning 2 aprel kuni Nurafshon shahridagi “Binafsha” nomli oilaviy nodavlat maktabgacha ta'lim tashkilotida yuz bergan.

– Bu bog'chani tashkil qilganimizga salkam 5 yil bo'ldi, – deydi muassasa rahbari Nasiba Isaeva. – Shu yillar ichida bunaqa holat kuzatilmagandi. Сhunki har kuni kameralardagi videoyozuvlar kuzatiladi. Bolalarni kaltaklagan shaxs M.Mirzaevani 2024 yilda ishga qabul qilganmiz. Uni darhol ishdan bo'shatdik. Сhunki bu harakatlarini hech narsa bilan oqlab bo'lmaydi. Negaki, kaltaklashdan eng avvalo bolaning ruhiyati qattiq zarba oladi. Bu keyinchalik ham o'z ta'sirini o'tkazishi tabiiy. Hozirda ota-onalarning murojaati asosida ish prokuratura nazoratiga olingan.

Biz kaltaklangan bolalardan birining yaqin qarindoshini topib, uni ham suhbatga tortdik.

– Videodagi o'sha qizaloq mening jiyanim bo'ladi, – deydi Risolat Abdullaeva. – Telegramdagi ota-onalar guruhiga videoni tashlashganida, jiyanimning kaltak yeb yig'layotganini ko'rib, unga achinib ketdim, ko'zlarimga yosh keldi. Axir bolalar ishonib topshirilgan tarbiyachi ham shunaqa shafqatsiz bo'ladimi? O'zi ham ona ekan, nahot bolalarni ayovsiz kaltaklayotganida o'z farzandlari ko'z oldiga kelmagan bo'lsa? Ming afsuski bunday holatlarning sira oxiri ko'rinmayapti. Kunda-kunora shunaqa xabarlar o'qishga o'rganib ham qoldik. Bu tizimda jiddiy islohot zarurga o'xshayapti, shunday qilishsinki, agar bu kabi holatlar kuzatiladigan bo'lsa, o'sha tarbiyachini bolalarga yaqinlashtirishmasin. Nimadir qat'iy chora ko'rilmasa, bu ketishda bolalarni kimga ishonamiz?

Ma'lum bo'lishicha, tarbiyachi M.Mirzaeva ikki farzandning onasi. 2024 yilning sentyabr oyida enaga sifatida ishga olingan. Mart oyidan tarbiyachilikka o'tkazilgan. Shu bilan birga, oliy ta'lim muassasasida pedagogika sohasi bo'yicha sirtdan ta'lim oladi. Ana xolos, demak bu tarbiyachi hali muassasani tamomlamay turib, bolalar bilan ishlashga noloyiqligin namoyon qilibdi-da.

Umuman olganda, yuqoridagi gaplarda jon bor. Darhaqiqat, nima uchun bog'chalarda norasidalarga bunday ozor berishlarning oxiri ko'rinmayapti? Maktabgacha va maktab ta'limi vazirligi tomonidan oliy ta'lim muassasalarida yetishib chiqayotgan kadrlarning ruhiyatini nazoratga olish bo'yicha jiddiy islohotlar qilish vaqti allaqachon kelmadimi?

Xolida Egamberdieva,
Ishonch.uz