Internetda boshlangan yo‘l 10 yillik qamoq bilan tugadi
Bugun dunyoning notinch hududlaridan panoh topgan terroristik tashkilotlar ijtimoiy tarmoqlar orqali odamlarni aldab, o‘z faoliyatlarini moliyalashtirish uchun mablag‘ yig‘ishmoqda. Afsuski, bunday aldovlar taʼsiriga tushib qolayotganlar orasida O‘zbekiston fuqarolari ham bor.
Jumladan, 1995 yil Qashqadaryo viloyatida tug‘ilgan fuqaro 2017 yilda Janubiy Koreya Respublikasining nufuzli universitetiga o‘qishga kiradi.
Xorijda tahsil olish davrida u ijtimoiy tarmoqlar orqali "jihod", "hijrat" va "shahidlik"ni targ‘ib qiluvchi shaxslarning audio-video maʼruzalari bilan tanishadi.
Suriyadagi qurolli to‘qnashuvlar aks etgan videolar taʼsirida uning ongi aqidaparastlik g‘oyalari bilan zaharlanadi.
Shu tariqa u "Instagram" va "Telegram" tarmoqlari orqali Suriya hududida faoliyat yuritayotgan "Tavhid va jihod katibasi" hamda "G‘uroba katibasi" kabi terroristik tashkilotlarga aloqador kimsalar bilan muloqotga kirishib, ularga taalluqli materiallarni tarqata boshlaydi.
Universitetni tamomlaganidan keyin ham Janubiy Koreyada qolgan mazkur shaxs "G‘uroba katibasi" terroristik tashkiloti media blogeri "Saad Muxtor"ning internet orqali amalga oshirgan aldovlariga ishonib, unga pul yuboradi. 2023 yilning dekabr oyida esa u O‘zbekistonga qaytib keladi.
2024 yilning iyul oyida Suriyadagi jangarilar safiga qo‘shilish maqsadida Turkiyaga boradi, ammo rejasi amalga oshmay ortga qaytadi.
Huquqni muhofaza qiluvchi organlar tomonidan o‘tkazilgan tezkor tadbir natijasida mazkur shaxs qo‘lga olinib, unga nisbatan jinoyat ishi qo‘zg‘atiladi.
Sud hukmi bilan u Jinoyat Kodeksining 244¹, 244², 155² va 155³-moddalarida nazarda tutilgan jinoyatlarni sodir etganlikda aybli deb topilib, 10 yil muddatga ozodlikdan mahrum qilindi.
Ingliz va koreys tillarini mukammal bilgan hamda nufuzli xorijiy oliygohni tamomlagan bu fuqaroning achchiq qismati boshqalarga saboq bo‘lishi lozim. Zero, qonun oldida barcha birdek javobgardir.
Maqolaga baho bering
0/50
0
0
0
0