U o'z ishining mohiri edi. 30 yildan buyon “Sirdaryosuvta'minot” AJ Guliston shahar bo'limida oqova suv tarmoqlari va tozalash inshootlari ustasi sifatida mehnat shartnomasi asosida ishlab kelardi. O'sha kuni ham o'z vazifasiga sidqidildan kirishdi. Ustaning to'ng'ich o'g'illari mustaqil hayot yo'llariga tushib olishgan. Kenjasi Toshkent kimyo-texnologiya instituti Yangier filiali 3-kurs talabasi. Ota ko'proq shu o'g'liga qayishadi. Hayolini bo'lmay ilm olishini istaydi. Ularning kelajagi uchun tinmay mehnat qiladi.

Odatiy ish kunlarining birida tarmoqda ro'y bergan nosozlikni bartaraf etayotgan chog'ida baxtsiz hodisa yuz berdi: suv oqishi oqibatida Hamza Irisboev ish joyida vafot etdi. Hodisa yuzasidan maxsus tekshirishlar o'tkazildi. Dalolatnoma rasmiylashtirildi. Unga ko'ra, marhumning olti yillik o'rtacha oyligidan kam bo'lmagan miqdorda bir marta beriladigan nafaqa hamda oyma-oy zarar pullarini belgilangan tartibda rasmiylashtirish ish beruvchi zimmasiga yuklatildi. Shunga qaramay, “Sirdaryosuvta'minoti” AJ bu masalaga befarq qarab keldi. Marhum Hamza Irisboevning o'g'li Muhiddin Quvondiqov yordam so'rab, O'zbekiston kasaba uyushmalari Federatsiyasi Sirdaryo viloyat kengashiga murojaaat qildi.

Kengash M.Quvondiqov manfaatida Guliston tumanlararo sudiga da'vo arizasi kiritdi. Sud ish materiallari bilan tanishib chiqib, hujjatlarda to'plangan dalillarga huquqiy baho berib da'vo arizasini qanoatlantirdi. Javobgardan manfaatdor shaxs M.Quvondiqov foydasiga jami 386.299.204 so'm undiriladigan bo'ldi.

Bahor Xolbekova,

Ishonch.uz