Samarqand shahrining Kimyogarlar qo'rg'onida nima bo'lgandi?

Samarqanddagi mudhish shov-shuvli voqelikdan etlar junjikdi. Voajab, 17 kishi qo'lbola spirt iste'mol qilib, vafot etgani haqidagi mish-mishlar nahotki rost bo'lsa?

Haqiqatan ham, Nurafshon mahallasida so'nggi to'rt kun ichida 7 kishi o'lgan. Bu hududga yondosh beshta mahalla va Past Darg'om tumanining Nayman mahallasida 9-12 yanvar' kunlarida yana o'n chog'li fuqaroni ham aroq olib ketgan bo'lsa?

Bosh prokuraturaning 13 yanvar kuni mazkur zaharlanish holati bo'yicha bergan rasmiy bayonotida 5 kishi qalbaki spirt yoki alkogoldan nobud bo'lgani aytildi.

Qalbaki va qo'lbola aroq bilan qanchalik kurashmaylik foydasi bo'lmayapti. So'nggi yigirma kunda mamlakatimiz va xorijdagi 28 nafar millatdoshimizning paymonasi aroq tufayli to'lgan.

Voqelikning eng alamlisi Samarqandda ro'y berdi. Ushbu hodisa ortidan yuzaga qalqib chiqayotgan qator savollar kishiga tinchlik bermayapti

Nurafshon mahallasidagi do'konning biror bir hujjatga ega emasligi-yu, qo'lbola aroq sotilishi, bu hudud ichkilikka ruju qo'yganlar “pitagi”ga aylanib qolgani haqida uzunquloq gaplarni-ku, asti qo'yavering. Samarqanddek muazzam shaharning aholi tig'iz bo'lgan maskanidagi holatdan mutasaddilarning nahotki xabari bo'lmasa? Kimyogarlar qo'rg'onidagi Nurafshon mahallasida bo'lib, shu savollarga javob izladik.

– Ko'chning ikki yuzi ikki mahalla hududiga qaraydi. Ayni qo'lbola aroq sotildi, degan do'kon bizning Nurafshon mahallamiz hududida, uning sohibi esa ko'chaning narigi beti Madaniyat mahallasi hududidagi xonadonda yashaydi. Do'kon va xonadon bir birining ro'parasida, – deydi mahalla raisi Xolmuhammad O'tamurodov. – Bu do'kon faoliyati hech mahal nazoratimizdan chetda qolmagan. Egasining aroq sotishga ruxsatnomasi yo'q. Shu bois uni hamisha ogohlantirib kelganmiz. Hatto do'koniga kuzatuv kamerasi ham qo'ydirgan edik. Unga o'tgan yilning noyabr' va dekabr' oylarida ham rasmiy ogohlantirish berilgan. Ammo u o'zining eski odatini qo'ymadi. Aftidan faoliyatini yashash xonadoniga ko'chirib olgan ko'rinadi. Сhunki spirtni tayyorlab berish uchun do'kondan ko'ra, xonadonda afzalliklar ko'proq bo'ladi.

Xolmurod O'tamurodovning aytishicha hududda arzon aroq ishqibozlari deyarli har kuni to'planishib turgan. Mahalla mutasaddilarini ko'rgach, bir zumda g'oyib bo'lishga odatlanishgan ekan.

Ichkilik bor joyda g'alva bor. Bu yerdagi arzon aroq shaydolaridan odamlar bezib qolgandir degan o'y o'tadi ko'nglimizdan.

– Do'konda aroq sotilganiga sira ko'zimiz tushmagan, – deydi do'konga yaqin ko'p qavatli uyda yashovchi Xayriniso Umarova. – Menimcha vafot etganlarning aksari ichkilikka ruju qo'ygan odamlar emas. Ko'chada cho'zilib, turpoqqa belanibyotganini ko'rmaganmiz. Hech bir g'alvali voqelikni ham eslay olmayman.

Nurafshon mahallasida ichkilik tufayli vafot etgan 7 nafar marhumdan 3 nafarining o'lim sabablari oydinlashayapti. Dastlabki xulosalarga ko'ra, 2 nafari qonida qand miqdori yuqorilab ketgan, bir nafari esa yurak hurujidan so'ng shifoxonaga yetmasdan jon bergan. Barchasida ichkilik bor.

– 39 yoshli qo'shnimiz ham ana shu aroqning kasofati tufayli olamdan o'tdi, – deydi Nurafshon mahallasida yashovchi fuqaro N.X. – U ikkinchi guruh nogironi edi. Ichib yurganiga ko'p ko'zimiz tushgan. Kasalligi bois ro'zg'or ham qilolmadi. Balki hayotidagi kemtiklik, ko'ngil dardlariga aroqdan malham izlagandir...

Ayni chog'da holat yuzasidan jinoyat kodeksining 186-moddasi (Xavfsizlik talablariga javob bermaydigan tovarlarni o'tkazish maqsadini ko'zlab ishlab chiqarish, saqlash, tashish yoxud o'tkazish, ishlar bajarish yoki xizmatlar ko'rsatish) 4-qismi «a» bandi bilan jinoyat ishi qo'zg'atilgan. Hozirda 75 va 57 yoshli ikki fuqaro gumonlanuvchi tariqasida tergovga jalb qilingan.

Nurilla ShAMSIEV