Tailanddan Janubiy Koreyaga uchib kelgan samolyot bortida 175 yo'lovchi va ekipajning olti nafar a'zosi bo'lgan. So'nggi ma'lumotlarga ko'ra, 47 kishi aviahalokat qurboni bo'lgan, qurbonlar soni oshishi mumkin.

Janubiy Koreyadagi Yonhap agentligi xabar qilishicha, Jeju Air aviakompaniyasi samolyoti Bangkokdan parvoz qilgan. Mamlakat janubi-g'arbida, Seuldan 288 km masofada bo'lgan Muan aeroportiga qo'nish chog'ida u uchish-qo'nish yo'lagi tashqarisiga chiqib ketib, to'siqqa urilgan.

Koreya televideniesi to'qnashuvdan keyin kuchli yong'in chiqqani aks etgan kadrlarni namoyish etdi.

Hodisadan keyin darhol qutqaruv amaliyoti boshlangan. Ular samolyotning dum qismida bo'lgan 29 kishi halok bo'lganini xabar qilishdi. «Qurbonlar soni oshishi mumkin, jabrlanganlarning ko'pchiligi og'ir ahvolda», — degan AFP muxbiriga o't o'chirish xizmati vakili.

Bir soat o'tib rasmiylar aviahalokat qurbonlari soni 47 kishiga yetgani haqida xabar berishdi.

Milliy o't o'chirish xizmati ikki kishini qutqarishning imkoni bo'lganini ma'lum qilgan: bular yo'lovchi hamda ekipaj a'zolaridan biri. Keyinroq mahalliy rasmiylar yana bir yo'lovchi qutqarilgani haqida xabar berishdi.

Yo'lovchilarning aksari, 173 kishi — Janubiy Koreya fuqarolari, yana ikki nafari — Tailand fuqarolari.

Hodisa sabablari hozircha ma'lum emas. Dastlabki ma'lumotlarga ko'ra, samolyot qushlar bilan to'qnashuv tufayli boshqaruvni yo'qotgan bo'lishi mumkin. Yonhap ma'lumotiga ko'ra, shu tufayli shassini boshqarish tizimi ishlamagan.