Нима учун келиннинг интилувчанлигини, меҳнатини, ҳаракатини аҳамиятдан четда қолдиришади?! Нима учун, ўқишдан ёки ишдан келган келин, дам олишдан қайтгандай тили қисиқ бўлиб, биронта уй ишларига улгурмай қолмаслик учун югуриб-елади?! Эркаклар ёки уйдаги бошқа катталар ишлаб келса, телевизор қаршисига ўтириб олиб, тайёр нон-чойни маза қилиб еб ўтиришадию, келинлар айб иш қилиб келган одамдай типирчилайди?!

Қайнона келинини, эр хотинини ўқитаётган бўлса, буни ким учун қилаяпти?! Келажакда мевасини ўзлари тотишмайдими?! Келин ўқиб, ишлаб топган маошини кўчага сочиб келадими ёки онасига олиб бориб берадими? Йўқ! Рўзғори учун сарфлайди, қолаверса, аёллар эркаклардан кўра кўпроқ уйим-жойим дейишларини ҳеч ким инкор қилмайди. Янаям билмадим, ҳар ҳолда аёллар чойхонага камроқ боришади. Қайнона келинини ишлашига рухсат берган бўлса, бу кимга яхши? Аввало ўз ўғлига эмасми? Рўзғор аравасини тортишда аравани устида ўтириб олмасдан, уни тортишда турмуш ўртоғига шерик бўлаётгани учун келин раҳматга муносиб эмасми?!

Нима учун бошқалар эркин ишлашади, келин эса иш юзасидан бирон жойга бормоқчи бўлса, руҳсатни ичида обдон репетиция қилиб, кейин сўраши керак, худди Чимёнга бораётгандай?...

Нима учун?!
Жамиятимизнинг кўпчилик аъзолари дунёқарашларини ўзгартириши керакдир, эҳтимол...

Озода ҲАБИБУЛЛАЕВА