Пойтахтимизнинг марказий туманларидан бири бўлган Юнусобод туманидаги "Отчопар-2" маҳалласи бир пайтлар шаҳардаги энг сўлим ва обод масканлардан бири бўлган. Аммо сўнгги 5-6 йил ичида шаҳарда авж олган янги қурилишлар бу ҳудудни ҳам четлаб ўтмади. Ачинарлиси, маҳалла сносга тушганлиги сабабли кўплаб хонадон соҳиблари бошқа жойларга кўчиб кетган бўлса, инвесторларнинг уларга маъқул келмаган таклифлари туфайли шу ерда қолган 35-40 чоғлик уй эгалари харобазор ичида яшаб кетмоқда.

Кўпчилиги кексалар, болалар ва аёллар бўлган аҳоли аввало ноқулай аҳволга келиб қолган шароитдан азият чекаётган бўлса, иккинчидан, ҳашаротлар ва дайди итлар тўдаси, ҳар ёқдан қазилган катлованлар дастидан юзага келган тупроқлар уюми, қўланса ҳид ва улкан техникаларнинг тинимсиз шовқинидан қийналмоқда.

Ishonch.uz маҳалла аҳлининг таҳририятга қилган мурожаати ортидан "Отчопар-2" маҳалласида бўлди.

Видеода кўриб турганингиздек, одамларнинг ҳаётида кечаётган яхши ўзгаришлар ҳақида гапириб турган бир пайтимизда, пойтахтнинг қоқ марказида шундай шароитда яшаб келаётган аҳоли борлиги ачинарли.

Ажабланарлиси, Тошкент шаҳар ҳокимлигининг ҳам, Юнусобод туман ҳокимлигининг ҳам бу ҳолатдан хабарлари бор. Аммо афсуски, неча марталаб масъуллар келиб кетишган, муаммони ҳал қилишга ваъда беришганига қарамасдан қаровсиз маҳалладаги 30-40 чоғли хўжаликнинг вазияти ўнгланмаяпти. Натижада одамлар умидсизликка ҳам тушиб қолишган.

Биз «Отчопар - 2» маҳалласи раҳбариятини қидириб, маҳалла гузарига ҳам бордик, ҳолатга у ердагилардан изоҳ сўрадик. Аммо маҳалла ходимлари ҳам бу масала маҳалла даражасидан юқорида ҳал бўладиган муаммо эканини, неча маротаба кўтариб чиқаётганига қарамасдан, ҳеч ким бирор гап айтмаётганини таъкидлади.

Демак, Тошкент шаҳар ҳокимлиги ва Юнусобод туман ҳокимлигидан ishonch.uz жиддий изоҳ кутиб қолади.

Ҳурматли, туман ва шаҳар масъуллари, "Отчопар-2" маҳалласи аҳолисини қийнаётган масала ечими учун сизлардан бирор ҳаракат, зарур чоралар кўрилмаётган экан, аҳоли дардини кимга бориб айтсин?

Наҳотки, ўз вазифангизни бажариш учун ОАВдаги чақириқлар, одамларнинг, айниқса бу ерда яшаётган кексаларнинг нолалари камлик қилаётган бўлса?

Зебо Намозова,
Қувонч Тўраев,
Ishonch.uz