Ушбу жиноий ишнинг кенг муҳокама қилинишига сабаб жабрланувчи томон, гарчи аввалги расмий маълумотларда исми тилга олинмаган бўлса-да, Президент Администрацияси Ахборот сиёсати департаментининг собиқ раҳбари Комил Алламжонов бўлганлиги эди.

Бош прокуратура воқеа содир бўлган кундан роппа-роса бир ой ўтиб, Алламжоновнинг суиқасд нишони бўлгани ҳақида ёзди ва ушбу жиноятни содир этишга алоқадор бўлган жами 7 нафар шахс аниқланиб, 5 нафари қамоққа олингани, 2 нафарига нисбатан эса қидирув эълон қилинганини билдирди.

Бир муддат ўтиб эса Бош прокуратура томонидан Комил Алламжоновга нисбатан содир этилган қотилликка уриниш билан боғлиқ жиноят иши доирасида Россия Федерацияси фуқаролари Бислан Расаев ва Шамиль Темирхановларга нисбатан халқаро қидирув эълон қилинди.

Улар қонунга хилоф равишда Ўзбекистонга кириш ва чиқиш, жиноят ҳақида хабар бермаслик ҳамда ўқотар қуролнинг қонунга хилоф муомаласи каби жиноий ҳаракатларни содир этганликда гумонланган.

Айни кунларда эса Комил Алламжоновга уюштирилган қуролли ҳужум ортидан очилган жиноий иш судга оширилган.

“Эзгулик” жамияти раиси, ҳуқуқшунос Абдураҳмон Ташановнинг ёзишича, “иш” бўйича маҳкама Ҳарбий судда, ёпиқ суд мажлисида бошланган.

“Судланувчилар сонининг кўплиги, қўйилаётган айбловнинг жиддийлиги ва ҳолатнинг жамоатчилик учун қанчалик муҳимлигига қарамасдан яна мавҳумлик ҳукм сурмоқда”, – деб ёзади Ташанов ушбу жиноий иш доирасида расмий маълумотлар берилмаётганига ишора қилиб.