Тиббиёт ходимлари 5 кунлик иш режимига ўтади
Ўзбекистон Республикаси Президентининг 09.11.2025 йилдаги ПҚ-336-сон қарори 5-бандига кўра 2026 йил 1 апрелдан бошлаб давлат тиббиёт муассасаларининг иш вақти режими:
5 кунлик иш ҳафтасига ўтказилади;
байрам ва дам олиш кунларида навбатчилик асосида ишлаш йўлга қўйилади.
Иш режимини 5 кунлик иш ҳафтасига ўтказиш учун Меҳнат кодекси талабларига кўра қуйидагиларни амалга ошириш керак:
1. Меҳнат кодексининг 137-моддаси 5-қисмига асосан оммавий равишда ходимларни меҳнат шартлари ўзгараётганлиги учун муассасанинг касаба уюшмаси қўмитаси билан дастлабки маслаҳатлашувларни ўтказиш (2026 йил 1 февралгача).
2. Иш режими белгиланган ички ҳужжатларни: жамоа шартнома (агар белгиланган бўлса), ички меҳнат тартиб қоидалари ва иш вақти жадвалларини касаба уюшмаси қўмитаси билан келишган ҳолда ўзгартириш (2026 йил 1 февралгача).
3. Меҳнат кодексининг 137-моддаси 2-қисмига асосан камида 2 ой олдин ходимларга (кундузги ходимларга) меҳнат шартлари ўзгариши ҳақида ёзма шаклда имзо қўйдириб, огоҳлантириш хати бериш (2026 йил 1 февралгача).
4. Ички ҳужжатларга киритилган ўзгартиришлар билан барча ходимларни таништириш (2026 йил 1 апрелгача).
5. Ходимлар (кундузги) билан меҳнат шартномаларига ўзгартиришлар киритиш (2026 йил 1 апрелгача).
Ички ҳужжатларга ўзгартириш киритишда Меҳнат кодексининг 184, 477 ва 478-моддалари ва Вазирлар Маҳкамасининг
14.11.2024 йилдаги 758-сон қарорининг 4 ва 8-иловаларида белгиланган ҳафталик ва кунлик иш вақти меъёрларига риоя этиш керак.
