Яқинда биз Тошкент шаҳар маркази, Мустақиллик майдони рўпарасида жойлашган "Ёшлар ижод саройи"да бўлиб, ёшларимиз ишончли қўлларда эканига гувоҳ бўлдик.

Тонгги соат 8:00дан тунги 23:00 гача фаолият юритадиган сарой айни пайтда ёшлар, талабалар хизматида. Тассавур қилинг, машҳур Пена саройидай ҳашаматли бир бино талабалар ихтиёрига бериб қўйилса... Бу жуда ажойиб, шундай эмасми?

Кузатувларимиз мобайнида ёшлар учун бу бино аллақачон иккинчи қадрдон уйга айланганига ишонч хосил қилдик. Бу ерда ёшлар қулай жиҳозларда китоб ўқиши, овқатланиши, тил ўрганиши, турли қизиқарли тўгаракларда иштирок этиши, эркин фикрларини билдириши ва чарчаган пайтда ҳатто ухлаши мумкин. Улар истаган либосида бинога кириши, бу ерга овқат ва китобларини кўтариб келиши, бошпанасиз қолган вақтда шу ерда тунги 23:00 гача яшаб туриши мумкин экан. Қисқаси, ёшлар демократиясининг ёрқин кўриниши бинода ҳукм сурмоқда.

Бугунги ёшларнинг дунёқараши, тафаккури аввалгиларидан кескин фарқ қилади. Глобал асрда уларнинг мустақил, қатъиятли ва собит шахс бўлиб шаклланиши учун шубҳасиз, соғлом муҳитга зарурат бор. Агар сиз ғала-ғовур шовқинли шаҳар ташвишларидан толиқсангиз ва ёшлик хотирларини ёдга олиш истагида бўлсангиз, шундай муҳит шаклланган ижод саройига албатта келиб кетинг...

Мафтуна Каримова,
Қувонч Тўраев,
"Ishonch.uz" мухбирлари