Qashqadaryodagi chorva mollarida aniqlangan kasallik maymunchechak emas
Ijtimoiy tarmoqlarda “Qashqadaryoda maymunchechak kasalligi aniqlandi” sarlavhasi ostida xabarlar tarqalganidan so'ng “Ishonch.uz” holatga aniqlik kiritish uchun Qashqadaryo viloyati veterinariya va chorvachilikni rivojlantirish boshqarmasi boshlig'i Shuhrat Eshmatovdan vaziyat yuzasidan izoh so'radi.
– Maymunchechak kasalligi Afrika mamlakatlarida inson va maymunlar o'rtasida kuzatilgani tasdiqlangan. Uning chorva mollarida ham uchrashi fanda o'z isbotini topgan emas. Qashqadaryo viloyatida yuz berayotgan ayrim chorva mollarida kuzatilayotgan salbiy holatlar yangilik emas va bu turli zararkunanda hasharotlarning chorva mollarini chaqishi orqali ro'y beradi. Xususan, keyingi besh yilda havo haroratining keskin o'zgarishi, anomal issiq bo'lishi natijasida turli pashsha va so'naga o'xshagan hasharotlarning chorva mollarini chaqishi oqibatida turli shishlar paydo bo'lishi, immuniteti past jonivorlarda esa bu holat ayrim hollarda o'lim bilan yakun topishi qayd etilgan. Lekin uning odamlarga yuqish xavfi aniqlanmagan.
Xalq tilida “guvalay”, “buvalay” deb ataluvchi so'naning chorva mollarining tuyoqlaridan chaqishi uning badanida turli shishlar yuzaga kelishiga, shishlar orasida qurtlar paydo bo'lishiga, ma'lum vaqt o'tib esa qurt kapalakka aylanib uchib ketishiga sabab bo'ladi. Viloyatimizning Shahrisabz, Kitob va Yakkabog' kabi tumanlari iqlimi nisbatan salqin bo'lganligi uchun ushbu hasharotning chorva mollariga ziyon yetkazish holatlari avvallari ko'p kuzatilmagan va natijada yaqin kunlarda yuz bergan holat aholi orasida ilmiy asoslarga tayanmasdan og'izdan-og'izga ko'chib maymunchechak kasalligi, deya tarqalib ketgan. Viloyatimizda maymunchechakka chalingan chorva mollari ro'yxatga olinmagan, bu kasallik mavjudligi tasdiqlanmagan. Qashqadaryoda chorva mollarining sog'lom parvarishini yo'lga qo'yish borasida ishlab chiqilgan chora-tadbirlar o'z samarasini beryapti.
Xususan, viloyatda 828 ta mahalla mavjud bo'lsa, u yerdagi aholi xonadonlarida parvarish qilinayotgan chorva mollarini belgilangan vaqtda nazoratdan o'tkazish yuzasidan 151 ta uchastka veterinariya xizmati yo'lga qo'yilgan. Unda 650 nafar mutaxassis faoliyat yuritmoqda. Joriy yilning yanvar oyidan hozirgi vaqtgacha chorva mollarini dezinfektsiya, dezinseksiya, deratizatsiya ishlari olib borilmoqda. Ayni vaqtda o'ta xavfli kasalliklarga qarshi kurashish bo'yicha mutaxassislardan iborat guruhlar tashkil etilgan va bu borada oldindan emlash ishlari o'z vaqtida amalga oshirib kelinmoqda.
Izohni “Ishonch.uz” muxbiri
Bahodir Halimov yozib oldi
Maqolaga baho bering
0/50
0
0
0
0