Ўтган йили декабрь ойида радио тинглаётгандим, шифокор оғзидан бол томиб, бир нечта дориларнинг таърифини келтирди. Кейин бошловчи ушбу тиббий воситалардан даво топган беморларнинг СМСларини ўқишга киришди. Шунақа илиқ фикрлар билдирилдики, ўша куниёқ қайта-қайта эълон қилинган телефон рақамларига қўнғироқ қилдим. Ўзини «диспетчерман» дея таништирган қиз мени Абдувоҳид Шодиев исм-шарифли шифокор билан боғлади.

Мулоқот давомида кечаси бир неча марта заҳар танг қилишини айтдим. Шифокор «Простаде Х ультра»ни тавсия қилди ва тузалиб кетишимни кафолатлади. «Агар дори таъсир қилмаса, қайтариб оламиз», деган ваъда ишончимни янада мустаҳкамлади. Шу тариқа 1 миллион 400 минг сўмга икки қути дори харид қиладиган бўлдим.

Декабрнинг иккинчи ўн кунлигида вилоят ҳокимлиги биноси қаршисида келишилган пулни олган ­курьер қўлимга дориларни тутқазди. Уйга келиб, қутини очиб, тиббий тавсияномага кўз югуртирдим. Қарангки, даволаниш курси 3 ойдан ошиқ вақт бўлгани ҳолда дорининг яроқлилик муддати тугашига 10 кун қолибди.

Табиийки, мутасадди билан боғландим. У дори эскирмаслигини, таъсирига кафолат беришини маълум қилди. Аврашга уста бўлгани учунми ёки тузалиш истагим кучлилиги туфайлими, кўндим. Ҳафта ўтар-ўтмас, дори таъсирида қорин ва бел қисмимда қизил тошмалар пайдо бўлиб, танам бехтўхтов қичий бошлади.

Яна алоқага чиқдим, мутахассис танамда табиий жараён кечаётганини айтиб, кўнглимни тинчлантирди. Дори қўлланмасида ҳам қичишишлар тўғрисида ёзилганди. Шу боис истеъмолни тўхтатмадим. Афсуски, бир ой кейин ҳам наф сезмадим, энг ёмони, қичишиш йўқолмади. Шундан сўнг шифокорга телефон қилиб, ваъдасини эсга солдим ва ҳеч бўлмаганда, дорилардан биттасини қайтариб олишини сўрадим. У мужмал гапирди, тушундимки, лафзида турмайди. Янада кулгилиси, бир неча қўнғироғимдан сўнг: «700 минг сўм тайёрлаб туринг, дорининг янгисини жўнатаман, буниси аниқ таъсир қилади», деди. Рози бўлмаганимдан кейин мендаги дорини янгисига алмаштиришни таклиф қилди...

Аслида соғлиғимга етказилган зарар, қолаверса, фирибгарлиги учун унинг устидан прокуратурага шикоят ёзишим мумкин эди. Аммо юз-хотир қилиб, яна ўша фирмага қўнғироқ қилдим. Бу сафар диспетчер ўзини Неъматжон деб таништирган йигит билан боғлади. У жуда мулойим сўзлашди, аммо гап-сўзидан пулимни бермасликларини тушундим.

Шу боис жорий йилнинг 2 февралида Соғлиқни сақлаш вазирлигига мактуб йўлладим. Унда бошимдан кечирганларимни батафсил баён этдим. Афсуски, орадан бир ой ўтса-да, вазирликдан жавоб келмади. Кейин вазирликка қўнғироқ қилдим. Гўшакни кўтарган аёл мурожаатим ИИВга йўналтирилгани, энди масъулият ССВ зиммасида эмаслигини билдирди.

Дарҳақиқат, кўп ўтмай маҳалламиз профилактика инспектори сим қоқиб, туман марказига ариза ёзиш учун келишим зарурлигини айтди. Бир неча кундан сўнг у мурожаатимни Истеъмолчилар ҳуқуқларини ҳимоя қилиш жамиятига жўнатганини маълум қилди.

Мен Неъматжон билан алоқани узмагандим. Гап орасида шикоятим қай манзилларда кезиб юрганига тўхталиб, охиригача боришимни қис­тириб ўтдим. Бу гапларим таъсир қилдими, Неъматжон пулимни қайтаришини айтди ва шунинг баробарида бошқа идораларга шикоят қилмаслигимни сўради. Ростданам, 3-4 кундан кейин уйимга курьер келди. Унга дорини қайтариб, 700 минг сўм олганим тўғрисида тилхат ёзиб бердим.

Бу «саргузашт»ни унутишим мумкин эди. Аммо ҳар куни радиода ўша дорилар реклама қилиняпти. Шу сабабли оммавий ахборот воситаларига мурожаат қилмоққа жазм этдим, токи бошқалар алданмасин. Сезишимча, ушбу ёлғончилар тузоғига мен каби тушганлар анча.

Радиодагиларни тушунаман, эшагини суғориб, пулини олишмоқда. Лекин гап соғлиқ ҳақида кетар экан, сохта дорилар рекламасини чеклаш ҳақида ўйлаб кўриш керак. Алдаб маҳсулотни ўтказиш, инсонни сарсон қилиш ва, энг асосийси, соғлиққа зиён етказиш қонунбузарлик эмасми? Билишимча, мазкур фирмалар Соғлиқни сақлаш вазирлигидан лицензия олади, ундай бўлса, мурожаатимга нега бефарқ қаралди?

Профилактика инспектори айт­ган Истеъмолчилар ҳуқуқларини ҳимоя қилиш жамиятидан ҳам жавоб олганим йўқ.

Шунча идорага мурожаат қилсанг-да, муаммонгни ҳал қилиш у ёқда турсин, шикоятингга икки қатор жавоб ёзиб, сени мавҳумлик гирдобидан қутқарадиган мард топилмаса, алам қиларкан. Давлат идоралари халқ хизматида бўлишига оид Президент талаби ижро этилмай қолаверадими?

Дарвоқе, орадан 2 ойдан ошиқ вақт ўтса ҳамки, танамдаги қичишиш­лар барҳам топмади. Шу ўринда ўзим телевизорда кўрган бир реклама ҳақида тўхталмоқчиман. Бир «аллома» чиқиб, яратган дориси 20 тага яқин касалликка даво бўлишини иддао қиляпти. Ижтимоий тармоқдаги бошқа бир рекламада эса икки қути томизғи билан қароқларингиз равшан тортиб, кўзойнакни отиб юборишингизни кафолатлашяпти.

Агар шу гаплар рост бўлганида дунёда касал қолмаслиги керак эди. Қисқаси, орамизда бировнинг соғлиғини бир чақага олмайдиган, жиғилдонини тўлдириш учун ҳар қандай пасткашликдан қайтмайдиганлар ҳам бор. Улардан эҳтиёт бўлинг!

Аъзам АНДАҚУЛОВ
Жиззах вилояти, Шароф Рашидов тумани