Kecha Toshkentda metro bekatida, Samarqandda esa yo'lda chaqaloq dunyoga keldi
Poytaxtimizning "G'afur G'ulom" metro bekatida chaqaloq dunyoga keldi. Poezdlarni qabul qilish va jo'natish bo'yicha navbatchi xodima — Naima Maxamadjanova vaziyat haqida ichki ishlar xodimidan ma'lumot olgan. U bir zumda holatni baholab, o'zidagi tibbiy bilim va ko'nikmalarni ishga solgan holda birinchi yordam ko'rsatgan.
Xodima chaqaloqning kindigini bog'lab, nafas olish refleksini faollashtirgan. Bu vaqtda tez yordam xizmati va ayolning yaqinlari chaqirilgan. Taxminan 10 daqiqa davomida bekat xodimlari ona va chaqaloq holatini nazoratda ushlab turgan.
Hozirda ona va chaqaloq shifoxonaga yetkazilgan bo'lib, ularning sog'ligi yaxshi.
Samarqand viloyatining Nurobod tuman tez tibbiy yordam stantsiyasi “Oqsoy” shoxobchasiga chaqriq kelib tushadi. Shoshilinch holatda yo'lga chiqqan tibbiy brigada chaqiriq joyida homilador bemorga yordam ko'rsatar ekan, tug'ruq jarayoni boshlanganini aniqlashdi. Ularning tezkor va aniq harakati tufayli chaqaloq tez tibbiy yordam avtomashinasida sog'-salomat dunyoga keldi.
Hozirda ona va bola sog'-salomat, ahvollari yaxshi, shifokorlar nazoratida.
Maqolaga baho bering
0/50
0
0
0
0