Dunyo hamjamiyatida bo'layotgan voqeliklarni kuzatar ekanmiz, bir tomonda murosaga kelishga qadam tashlash qiyin kechayotgan Rossiya va Ukraina, bir tomonda bolalar, ayollar, begunoh insonlar vahshiylarcha o'ldirilayotgan G'azo va o'z harakatlarini oqlashga asos topayotgan Isroil munosabatlariga ko'zimiz tushadi.

Bir tomonda musulmonlarning himoyasidan bezovta Eron. Yana bir tomonda esa yangi hukumat qurilishi boshlanayotgan Suriya va o'z yurtiga qaytayotgan qochoqlar...

Saylovlar arafasida Rossiya-Ukraina urushini bir kunda to'xtatishni va'da qilgan AQShning bo'lajak rahbari, tobora bu va'dani uddalashning oson emasligini anglayotgan bo'lsa ajab emas. Uning atrofidagilar allaqachon buni ta'kidlashgan edi.

Xullas, 2025 yil o'tgan yilgidan ko'ra ancha notinch va tahlikaliroq kutib olinmoqda. Sababi yon qo'shnilarimizdan biri, endigina tinchlik hukm sura boshlagan Afg'onistonda Pokiston bilan kelishmovchilik kelib chiqdi. Oqibatda Tolibon hukumati chegaradagi qishloqqa berilgan zarbaga javoban Pokiston armiyasiga qarshi harbiy operatsiya boshlanganini e'lon qildi.

Tolibon kuchlari bugun ertalab boshlangan javob operatsiyasi davomida Pokiston bilan chegaradagi bir nechta nazorat-o'tkazish punktlarini egallab oldi.
Ma'lumotlarga ko'ra, Pokistonning Afg'oniston hududiga havo hujumlari natijasida 46 ta tinch aholi halok bo'lgan.

Nima ham derdik, sehrli Qorbobodan tayoqchasini bir silkitib, butun dunyoda tinchlik o'rnatishini so'raymiz. Garchi bu ertak ekanini anglasak-da, mingyillik qadriyatlarimizga tayanib, bayram arafasida yaxshi niyat qilib, Yaratgandan so'raymiz: 2025 yilda urushlar barham topsin. Yurtimizda va butun olamda tinchlik bo'lsin. Insonlarning ko'z yoshlari to'kilmasin!

Zebo Namozova