– Ijarada turgan uyimizning egasi bildirmasdan uyni sotib yuboribdi, – deydi D.Ergasheva. – Vaholanki, u bilan ijara shartnomasi tuzib, bir yillik pulni to'lagan edik. Buning uchun turmush o'rtog'im kredit olgan edi. Endi esa ham bankdan qarzdormiz, ham ko'chada qoldik. Turmush o'rtog'im it ovlovchi bo'lib ishlaydi, oyligi juda kam. Men esa, yosh bolalar bilan hozircha hech qaerda ishlolmayman. Mahalla raisi, hokimga bir necha marta uchrashdik. Ammo foydasi bo'lmadi. Ilojsiz ko'chada yuribmiz. Bolalarimga sutli bo'tqa beraman. Uni ham har kimning uyida pishirib olyapman.

Kunduzi ko'chalarda yumush qilib bolalar bilan birga aylanib yuramiz, kechasi esa bir joyda to'xtab mototsiklning aravachasida uxlaymiz. Kecha tunda havo biroz salqin bo'lgani uchun katta farzandimning tomog'i shishib ketgan. Uni o'z holimcha davolayapman. Shunday sarson bo'lib yuraveramizmi, nahotki bizga hech kim yordam bermasa?..

D.Ergashevaning qo'shimcha qilishicha, unga mahalla idorasidagilar ishlashni taklif qilishgan. Kimdir esa, biror joyga palatka tikib olishni maslahat bergan. Ayol bolalarining yoshi juda kichik bo'lsa ham ishlashga rozi, ammo ularning ovqatiga, xavfsizligiga kimdir qarashi kerak. Xullas, chorasiz qolgan ona ayni paytda har eshikka bosh urib ko'rmoqda. Mutasaddilar tez orada bunga yechim topib, chora ko'radilar, degan umiddamiz.