БМТ Бош Ассамблеяси Исроилни Жўлон тепаликларини озод қилишга чақирувчи резолюцияни қабул қилди. Ҳужжатда Жўлон тепаликлари “Исроил босиб олган” ҳудуд сифатида тилга олинган.

Бош Ассамблея йиғилишида 91 давлат вакиллари (жумладан, Ўзбекистон ҳам) резолюцияни қўллаб-қувватлаган. Саккиз давлат (жумладан АҚШ ва Буюк Британия) ҳужжатга қарши овоз берди. Яна 62 давлат ушбу резолюция учун овоз беришда бетараф қолди.

Ҳужжат кўриб чиқиш учун Миср, Иордания, Ироқ, БАА ва Сурия вакиллари томонидан тақдим этилган.

Исроилнинг БМТдаги доимий вакили Гилад Эрдан резолюция қабул қилингандан сўнг, унинг мамлакати ушбу ҳужжат талабларини бажаришни имконсиз деб ҳисоблашини билдирди.

“Биз бу резолюция матнига қатъий қаршимиз ва уни принципиал жиҳатдан амалга оширмоқчи ҳам эмасмиз. Бу БМТ ҳозирда Исроилга нисбатан адекват қарорлар қабул қила олмаётганининг яна бир тасдиғи бўлди”, – дейди у.

Маълумот учун, Жўлон тепаликлари 1967 йилгача Сурия ҳудуди бўлиб, олти кунлик уруш пайтида Исроил томонидан босиб олинган ва кейинчалик яҳудий давлати таркибига киритилган. Жўлон тепаликларининг 1981 йилда Исроил таркибига қўшиб олингани эса халқаро ҳамжамият томонидан тан олинмади. Жумладан, БМТ Хавфсизлик Кенгашининг тегишли резолюцияси Исроилнинг Жўлон устидан суверенитетини рад этди.

Шундан буён бу ҳудуднинг қайтарилиши ҳам араб-исроил урушининг сабабларидан бирига айланган.