Ишониш қийин, аммо баъзи одамларнинг оддий сувга ҳам аллергияси бўлиши фанда исботланган. Бу тиббиётда камдан-кам учрайдиган ҳолат. Бунда терининг оддий сув, денгиз суви, ёмғир ҳатто кўз ёш сувларига ҳам реакцияга киришиши кузатилади. Бу аллергия турининг давоси ҳозиргача фанга номаълум.

Сувга нисбатан аллергия эркакларга нисбатан аёлларда кўпроқ учрайди ва биринчи марта балоғат ёшида таъсир қилади. Тиббиёт олимларининг қайд этишича, бу аллергия юз берганида тери сувнинг ўзига эмас, унинг таркибидаги аллерген бўлган баъзи кимёвий моддаларга нисбатан реакцияга киришади. Кўпинча тошмалар қўл ва оёқларни қоплайди, терида қуриш ва тортишиш, бош оғриғи, кўнгил айниши ва ич кетиши ҳолатлари ҳам кузатилади. Бу ҳолатлар ҳаёт учун ҳеч қандай хавф туғдирмайди ва маълум вақт ичида, ҳеч қандай дориларсиз ўтиб кетади.

Мутахассислар бу аллергиянинг хуруж қилмаслиги учун фильтрланган сувдан фойдаланиш, ванна ва душ қабул қилганда турли геллардан фойдаланмаслик, уларни болалар совунига алмаштириш, сувни қайнатиб ишлатиш ва доим иммунитетни кўтариб юришни тавсия қилишади.

Яхшиямки, бу аллергия сув ичга қабул қилган пайтда хуруж қилмайди, бўлмаса, унга чалинганларнинг аҳволи не кечарди?

Холида Эгамбердиева тайёрлади