Қирғизистонлик сиёсатчи АҚШ фуқаролари учун визасиз режимни қайта кўриб чиқишни таклиф қилди
Қирғизистонлик сиёсатчи Эдил Байсалов АҚШ фуқаролари учун визасиз режимни қайта кўриб чиқиш ташаббусини илгари сурди. Бу ҳақда у кеча АҚШ Давлат департаменти томонидан эълон қилинган янги виза талабларига муносабат билдириб маълум қилган.
Унинг сўзларига кўра, мазкур таклиф АҚШ томонидан Қирғизистон фуқароларига нисбатан жорий этилаётган янги шартлар билан боғлиқ. Янги талабларга мувофиқ, Қирғизистон фуқаролари АҚШ визасига мурожаат қилишда 5 мингдан 15 минг АҚШ долларигача депозит қўйишлари шарт бўлади.
Қайд этилишича, депозит миқдори ариза берувчи томонидан эмас, балки консуллик ходими томонидан ҳар бир ҳолат алоҳида тартибда белгиланади. Ушбу депозит бизнес ёки туристик визалар (B-1/B-2) учун ариза топшириш жараёнида талаб этилади.
Эдил Байсаловнинг таъкидлашича, виза сиёсати — бу тенглик ва ўзаро ҳурмат масаласидир. У ижтимоий тармоқдаги саҳифасида қуйидагиларни ёзган:
«Агар фуқароларимиз учун шундай юқори тўсиқлар жорий этилса, биз ҳеч нарса бўлмагандай ҳаракат қила олмаймиз».
Маълумот учун: 21 январдан бошлаб Қирғизистон фуқаролари АҚШга туристик ва бизнес визаси (B-1/B-2) учун мурожаат қилганда 5 мингдан 15 минг АҚШ долларигача депозит қўйишлари лозим бўлади. Агар виза эгасининг мақоми ўзгартирилса ёки АҚШда қолиш муддати узайтирилса, ушбу депозит қайтарилмайди.
Долзарб мавзулар
Mақолага баҳо беринг
0/50
0
0
0
0