Яқинда Давлат сиёсати ва бошқаруви академиясида Оила ва хотин қизлар қўмитаси, “Ҳамроҳ” компанияси, Бирлашган Миллатлар Ташкилоти Тараққиёт дастури ҳамкорлигида тадбиркор аёллар учун “Аёл, бизнес, инновация” мавзусидаги ўқув семинари ташкил этилди.

У ерга республикамиз бўйлаб турли соҳаларда тадбиркорлик фаолиятини йўлга қўйган опа-сингилларимиз ташриф буюришди.

Семинарда 165 нафар етакчи ва истиқболли тадбиркор аёллар иштирок этиб, бизнесни ривожлантириш, маҳсулотни экспортга чиқиш, электрон тижорат каби муҳим йўналишларда билим ва кўникмаларга эга бўлишди.

Қатнашчилар билан мулоқот қилиб, яқиндан суҳбатлашиб, уларнинг ҳар бири катта юрак соҳиби – замонамиз қаҳрамонлари эканини англадим. Нега десангиз, бир пайтлар оддий ишчи-ходим бўлган аёллар бугун катта-катта ғояларни амалга оширмоқда. Қўл остида камида 7-8 нафардан тортиб, 500 нафаргача бўлган ишчилари бор улкан жамоага раҳбарлик қилмоқда. Шундай бўлгач, улар албатта бугунги замонамиз қаҳрамонлари-да!

***

Улардан бири сирдарёлик Шаҳло Азимова...

Опа бир пайтлар болалар боғчасида тарбиячи ёрдамчиси бўлиб ишлаган. Кейинчалик бир дугонасининг таклифи билан аёллар сарторошлиги касбини ўрганиб, гўзаллик салонларидан бирида ишлай бошлади. Кўп ўтмай ўзи ҳам шундай гўзаллик салони очди. Кейинчалик эса хонадон боғчаси, Ижтимоий ҳимоя миллий агентлиги билан ҳамкорликда ёлғиз қолган қариялар ҳолидан хабар олиб, уларнинг уйини тозалаб, овқатини қилиб берувчи ходимларни бирлаштирган марказ очди. 10 нафардан ошиқ ишчи-ходимлари бор.

***

Яна бир тадбиркор қашқадарёлик Гулшан Бувражабова. У асли тикувчи бўлиб, 2022 йилдан буён оилавий тадбиркор сифатида аёллар ва эркаклар кийими ишлаб чиқариш билан шуғулланиб келмоқда.
Қўл остида 10 дан ошиқ шогирдлари бор. Бундан ташқари маҳалла гузарида ёшларга касб-ҳунар ўргатувчи марказ ҳам ташкил этган. У ерда тикувчилик, қандолатчилик, болалар массажи, болалар боғчаси энагаси каби йўналишларда ёшларни ҳаётга тайёрлайди. Жами 100 дан ортиқ ишчиси бор. Гулшан опа Туркия ва қирғизистонлик ҳамкасблари билан ҳамкорликни йўлга қўйган. Бунинг натижасида ҳамма туркиядан кийим олиб келса, опа жамоаси билан туркияга ва қирғизистонга кийим тикиб юборади ва эавазига яхшигина ҳақ олади.

***

Каттақўрғонлик Гулмира Жумаева чиқиндини қайта ишлашни йўлга қўйган. 426 нафар қонуний ва доимий ишловчи ходими бор. Уларнинг 123 нафари ногиронлиги бўлган ва кам таъминланган оила вакилларидир.

–Бугун Каттақўрғон кўчаларида чиқинди кўрмайсиз, ходимларим кўча куйлардаги баклажка, салафан, қоғоз, темир, хуллас нимаики шаҳримиз ҳуснига доғ бўлиб ётган чиқиндилар бўлса, уларни йиғиб келишади. 26 хил турдаги чиқиндини қайта ишлаб, етти хил турдаги маҳсулот чиқарамиз. Энг кам маош оладиган ходимим – 3 млн сўм олади. Ҳар куни ишчиларим билан бирга, бир столда тушлик қиламан, – дейди Гулмира опа.

***

Ҳа, четдан қараганда тадбиркорлик жуда ҳавас қилгулик ишдек туюлади. Аслида ҳам шундай. Юртимизда ишлаб чиқаришни йўлга қўяётган, ишсиз юртдошларимизни иш билан таъминлаб даромад топишига сабабчи бўлаётган бундай аёлларимизнинг изланиши, интилиши таҳсинга лойиқ. Аммо бунинг ортида жуда катта матонат, қийинчиликлар ва югур-югурлар турганини ҳамма ҳам ҳис этавермайди. Кўпчилик тадбиркорлар иш бошлаётганларида банклардан катта миқдорда кредитлар олишган. Эндиликда ойма-ой ана шу кредитларни тўлаб боришади ва шу билан бирга, бошлаган ишларида янгиликлар, қулайликлар қилишга ҳам ҳаракат қилишмоқда.

Оиладан, фарзандлар тарбиясидан ортиб, ана шундай улкан ишлар билан банд бўлган, давлатимиз фаровонлигига муносиб ҳисса қўшаётган, юраги катта замонамиз қаҳрамонларига соғ бўлинг, омон бўлинг, асло кам бўлманг, деб қоламиз.

Зебо НАМОЗОВА
Ishonch.uz