“Пекин шаҳрига жуда қисқа, бироқ самарали ташриф бўлди. Хитой Халқ Республикаси билан икки томонлама музокаралар ниҳоясига етди.
Фурсатдан фойдаланиб ХХР Тижорат вазирлиги, вазир ўринбосари Ли Фей, департамент директори Ли Дефенг жаноблари ва бутун жамоага конструктив мулоқот учун чуқур миннатдорчилик билдирамиз”, – дейди Ўрунов.

У, шунингдек, йил якуни Ўзбекистоннинг Жаҳон савдо ташкилотига аъзолиги буйича унумли бўлгани, жумладан, иккита энг йирик глобал савдо эгалари – Америка ва Хитой билан музокалар якунланганини таъкидлайди.

Шу тариқа Ўзбекистон бу йўлда жами 22 та мамлакат билан музокараларини якунлади.

Маълумот учун, бугун, 29 ноябрь куни ЖСТ Бош кенгашида доктор Нгози Оконджо-Ивеала номзоди ЖСТ Бош директори лавозимига иккинчи муддатга 2029 йил 31 августгача тасдиқланди.

Нгози Оконджо-Ивеала ўз дастури тақдимоти чоғида ЖСТ аъзоларини 2026 йилда Камерунда бўлиб ўтадиган навбатдаги вазирлар конференцияси аъзолигига Ўзбекистон, шунингдек, Босния ва Герцеговинанинг энг истиқболли номзодлар сифатида қабул қилинишига эътибор қаратишга чақирган.