– Kasaba uyushmalari xalq bilan davlat o'rtasidagi mustahkam ko'prikka aylandi. Bugungi kasaba uyushmalari kechagidan farq qiladi,- dedi anjumanni ochib bergan viloyat hokimi vazifasini bajaruvchi Erkinjon Turdimov- Ushbu tashkilot ko'magida sanatoriylarda dam olayotgan fuqarolar, bolalari oromgohlarda sog'lomlashayotgan kam ta'minlangan ota-onalarning xursandchiligi cheksiz. Jumladan, “Ayollar daftari” tizimining besh bosqichida viloyat bo'yicha 72 259 nafar xotin-qiz muammosi hal etilishida kasaba uyushmalari muhim o'rin tutdi.

Anjumanda viloyat kasaba uyushmalari kengashining 2020–2025 yillardagi faoliyatiga oid hisoboti, shuningdek, navbatdagi ustuvor vazifalar muhokama qilindi. Kengash taftish komissiyasining faoliyati to'g'risida axborot tinglandi.

– Asosiy e'tibor quyi bo'g'in – boshlang'ich kasaba uyushma tashkilotlari hamda tuman va shahar kengashlari nufuzi va salohiyatini oshirishga qaratilmoqda. Hozirgi kunda viloyat kengashi tizimidagi 1 392 ta boshlang'ich kasaba uyushma tashkilotlarida 198 591 nafar a'zo jamlangan,- dedi O'zbekiston kasaba uyushmalari Federatsiyasi Sirdaryo viloyati kengashi raisi Rustambek Tursunmurodov o'z hisobotida..

2025 yilning fevral'–mart oylarida barcha boshlang'ich tashkilotlarda, shu jumladan birlashgan kasaba uyushmalarda hisobot-saylov yig'ilishlari va konferentsiyalar o'tkazildi. Ularda jami 67 735 nafar xodim ishtirok etdi. Yangidan saylangan 266 nafar boshlang'ich tashkilot raislarining 40 foizini ayollar tashkil etadi.

Delegatlar tomonidan viloyat kengashi raisi lavozimiga ikki nafar nomzod taklif etildi. Yashirin ovoz berish orqali o'tkazilgan saylov natijasida 98 nafar delegatdan 93 nafari Rustambek Tursunmurodov nomzodini qo'llab-quvvatladi. Shuningdek, shaffoflik asosida tashkil etilgan saylovda Oybek Ashurmatov va Bahodir Hamidjonov rais o'rinbosarlari etib saylandilar.

Anjumanda O'zbekiston kasaba uyushmalari Federatsiyasi Qurultoyiga delegatlar saylandi.

Bahor Xolbekova