Tezkor tadbir davomida muqaddam bezorilik jinoyati bilan sudlangan tungi klub rahbari “Instagram” tarmog'i orqali respublikaning turli hududlaridan ishsiz va ijtimoiy himoyaga muhtoj ayol-qizlarni tanlab olgani aniqlandi. Ularga “yuqori maosh” va “raqqosalik faoliyati” va'da qilinib, Buxoro shahriga olib kelingan. So'ngra ularning erkinligi cheklanib, ruhiy va jismoniy tazyiq orqali tungi klub mijozlari bilan jinsiy aloqa qilishga majburlangani ma'lum bo'ldi.

Jabrlanuvchilarning ishlab topgan mablag'lari klub rahbari tomonidan majburiy ravishda tortib olingan, bo'ysunmaganlarga nisbatan tan jarohati yetkazilgan.

Tadbir davomida tungi vaqtda klubda faoliyat yuritayotgan 23 nafar ayol-qiz Buxoro shahar bo'yicha ichki ishlar faoliyatini muvofiqlashtirish boshqarmasiga olib borildi.

Hozirda tungi klub rahbariga nisbatan jinoyat ishi qo'zg'atilib, qamoq ehtiyot chorasi qo'llanilgan. Klub ish yurituvchilari va ushbu noqonuniy faoliyatga aloqador boshqa shaxslarga nisbatan tegishli huquqiy choralar ko'rilmoqda.