Farg'ona viloyatida favqulodda holat yuz berdi. Avtomobil' yo'lining bir qismi o'pirilib tushdi. Oqibatda harakatlanib ketayotgan Damas ag'darilib ketgan. Holat Bag'dod tumani hududidan o'tgan yo'lda sodir bo'lgan.

Bunga sabab yo'lning o'ng tomonidan oqib o'tuvchi Farg'ona kanalida suv sathi ko'payib avtomobil' yo'lining tag qismidan sizib o'tishi natijasida asfal't yo'l qoplamasida cho'kish yuzaga kelgan, deyiladi Farg'ona viloyati Avtomobil' yo'llari bosh boshqarmasi matbuot xizmati xabarida.

Hozirgi vaqtda mazkur avtomobil' yo'lining Qo'qon-Farg'ona yo'nalishi bo'yicha vaqtinchalik harakat cheklangan bo'lib, yo'lning cho'kkan qismida ta'mirlash ishlari olib borilmoqda.