Нуротадаги «ногирон» симёғоч болалар ўлимига сабабчи бўлмасин
Нурота туманининг адирлар ичида жойлашган Тинчлик маҳалла фуқаролар йиғинида ҳам ҳаёт қайнаган. Кимдир ўқишга, кимлардир эса ишга отланган. Қишлоқнинг асосий драйвери эса балиқчилик ва чорвачиликдир. Сабаби, қишлоққа Айдаркўл жуда яқин.
Тинчлик маҳалла фуқаролар йиғини вилоят марказидан қарийб 100 км узоқликда бўлишига қарамасдан, аҳоли учун зарур шарт-шароитлар яратилган. Аммо, лекин, бироқ...
Агар сиз ушбу қишлоққа борсангиз, 31-мактаб яқинидаги ёнбошлаб қолган, бугун ё эрта қулаб тушишга тайёр турган симёғочни кўришингиз мумкин. Аянчли электр тармоғи ва «ногирон» симёғочга маҳаллий аҳоли кўникиб қолган.
«Столба»лардаги симлар чўзилиб, пастлаб кетган. Ағдарилиб кетиши ҳеч гап эмас. Қишлоқдагилар эса фарзандларидан хавотирда.
Ишончимиз комилки, туман ҳудудий электр тармоқлари корхонаси бундан хабардор ва бу мутасаддилар учун сир эмас. Ахир, аҳоли вакиллари уларга бир эмас, бир неча марта мурожаат билан чиқишган.
Истардикки, масъуллар Тинчлик маҳалласидаги ҳолатга эътибор қаратишса, ўзларини шу маҳаллада яшовчилар ўрнига қўйиб кўрса... Ана шунда муаммо ечими учун амалий ҳаракатлар бошланармиди?
Умид Худойқулов,
Ishonch.uz
Maqolaga baho bering
0/50
0
0
0
0