Ishonch.uz мухбири батафсил изоҳ олиш мақсадида ушбу муассасада бўлди.

Маълум бўлишича, холат жорий йилнинг 2 апрел куни Нурафшон шаҳридаги “Бинафша” номли оилавий нодавлат мактабгача таълим ташкилотида юз берган.

– Бу боғчани ташкил қилганимизга салкам 5 йил бўлди, – дейди муассаса раҳбари Насиба Исаева. – Шу йиллар ичида бунақа ҳолат кузатилмаганди. Чунки ҳар куни камералардаги видеоёзувлар кузатилади. Болаларни калтаклаган шахс М.Мирзаевани 2024 йилда ишга қабул қилганмиз. Уни дарҳол ишдан бўшатдик. Чунки бу ҳаракатларини ҳеч нарса билан оқлаб бўлмайди. Негаки, калтаклашдан энг аввало боланинг руҳияти қаттиқ зарба олади. Бу кейинчалик ҳам ўз таъсирини ўтказиши табиий. Ҳозирда ота-оналарнинг мурожаати асосида иш прокуратура назоратига олинган.

Биз калтакланган болалардан бирининг яқин қариндошини топиб, уни ҳам суҳбатга тортдик.

– Видеодаги ўша қизалоқ менинг жияним бўлади, – дейди Рисолат Абдуллаева. – Телеграмдаги ота-оналар гуруҳига видеони ташлашганида, жиянимнинг калтак еб йиғлаётганини кўриб, унга ачиниб кетдим, кўзларимга ёш келди. Ахир болалар ишониб топширилган тарбиячи ҳам шунақа шафқатсиз бўладими? Ўзи ҳам она экан, наҳот болаларни аёвсиз калтаклаётганида ўз фарзандлари кўз олдига келмаган бўлса? Минг афсуски бундай ҳолатларнинг сира охири кўринмаяпти. Кунда-кунора шунақа хабарлар ўқишга ўрганиб ҳам қолдик. Бу тизимда жиддий ислоҳот зарурга ўхшаяпти, шундай қилишсинки, агар бу каби ҳолатлар кузатиладиган бўлса, ўша тарбиячини болаларга яқинлаштиришмасин. Нимадир қатъий чора кўрилмаса, бу кетишда болаларни кимга ишонамиз?

Маълум бўлишича, тарбиячи М.Мирзаева икки фарзанднинг онаси. 2024 йилнинг сентябр ойида энага сифатида ишга олинган. Март ойидан тарбиячиликка ўтказилган. Шу билан бирга, олий таълим муассасасида педагогика соҳаси бўйича сиртдан таълим олади. Ана холос, демак бу тарбиячи ҳали муассасани тамомламай туриб, болалар билан ишлашга нолойиқлигин намоён қилибди-да.

Умуман олганда, юқоридаги гапларда жон бор. Дарҳақиқат, нима учун боғчаларда норасидаларга бундай озор беришларнинг охири кўринмаяпти? Мактабгача ва мактаб таълими вазирлиги томонидан олий таълим муассасаларида етишиб чиқаётган кадрларнинг руҳиятини назоратга олиш бўйича жиддий ислоҳотлар қилиш вақти аллақачон келмадими?

Холида Эгамбердиева,
Ishonch.uz