Охирги пайтларда бундай ҳолатлар вилоятлар ва шаҳар марказидаги кўплаб бозор комплексларида ҳам кузатилмоқда. Бунга катта эҳтимол билан дўкондорларнинг эҳтиётсизлиги, электр тармоқларидаги муаммолар сабаб бўлиши мумкин. Аммо қарорга мувофиқ бозорларда чақирув сигналлари ўрнатилиши, кечаю-кундуз қўриқлаш тизими ишлаши кераклиги белгиланган. Шундай экан нима учун бу ҳолатлар кўпайиб бормоқда? Ёки масаланинг бошқа томони ҳам борми?

Йирик бозорларни видеокузатув камералари, ташвиш-чақирув сигнализацияси, ёнғин сигнализацияси, ташвиш тугмалари ва хавф-хатардан овозли хабар берувчи ускуналар каби хавфсизликни таъминлаш техник воситалари билан жиҳозлаш талаблари бўйича Ўзбекистон Республикаси Вазирлар Маҳкамасининг “Йирик бозорларда жамоат тартибини сақлаш ва ёнғин хавфсизлигини таъминлаш тизимини такомиллаштириш чора-тадбирлари тўғрисидаги” қарорида белгиланган.

Бизда савол туғилади: мутасаддилар бозорларнинг хавфсизлигини таъминлаш борасидаги қарорга масъулиятсизлик билан ёндошадими ёки қўриқлаш тизимидаги муаммолар сабаб бўлмоқдами? Ёки ёнган бозорлар ўрнида бозор қайтиб қурилмас деган гапнинг ўз тасдиғи борми?
Бу каби ҳолатларнинг сабабига бизнинг шунчаки тахминимиз эмас тегишли мутасаддиларнинг аниқ жавоби керак. Тергов ишларининг натижалари ўрганилиб, тизимли ёндашув зарур. Аммо бу ҳолатлар юзасидан мутасаддилар жим. Зеро, рўзғор ташвишида юрган жабрдийда аҳолини ким ўйлайди?

Диёра Равшанова
Ishonch.uz